سیئول:جنوبی کوریا کے موان ایئرپورٹ پر ایک مسافر طیارہ لینڈنگ کے دوران حادثے کا شکار ہو گیا، جس کے نتیجے میں 179 افراد جاں بحق اور کئی زخمی ہوگئے۔
غیر ملکی خبر رساں ادارے کے مطابق حادثہ اس وقت پیش آیا جب طیارے کے لینڈنگ گیئر میں خرابی پیدا ہوئی۔ طیارہ رن وے سے اتر کر باڑ سے ٹکرا گیا، جس کے باعث طیارے میں آگ بھڑک اٹھی۔
حادثہ موان ایئرپورٹ پر پیش آیا، جو جنوبی کوریا کا مصروف ہوائی اڈہ ہے۔ یہ طیارہ تھائی لینڈ کے شہر بنکاک سے واپس آرہا تھا اور اس میں 175 مسافر اور 6 عملے کے ارکان سوار تھے۔
ایمرجنسی عملے نے فوری کارروائی کرتے ہوئے آگ پر قابو پایا اور زخمیوں کو طیارے سے نکالا۔ دو افراد کو زندہ نکال لیا گیا، جبکہ دیگر زخمیوں کو قریبی اسپتال منتقل کیا گیا۔ اسپتال انتظامیہ کے مطابق، کئی زخمیوں کی حالت تشویشناک ہے۔
ابتدائی تحقیقات میں لینڈنگ گیئر کی خرابی کو حادثے کی وجہ قرار دیا گیا ہے۔ ایوی ایشن حکام اور ماہرین حادثے کی وجوہات جاننے کے لیے تحقیقات کر رہے ہیں۔
ایئرپورٹ انتظامیہ نے واقعے پر گہرے دکھ کا اظہار کیا اور متاثرہ خاندانوں سے ہمدردی ظاہر کی۔ انتظامیہ کا کہنا ہے کہ ایمرجنسی عملے کی بروقت کارروائی سے بڑی تباہی سے بچا گیا۔
ایئرلائنز کو ہدایت دی گئی ہے کہ حفاظتی معیار پر سختی سے عمل کریں۔ حکام نے کہا ہے کہ تحقیقات مکمل ہونے پر مزید تفصیلات جاری کی جائیں گی، جبکہ مسافروں کے اہل خانہ کو اطلاع دینے کا عمل بھی جاری ہے۔
