رمضان المبارک کی تاریخ کا اعلان کردیا گیا

پاکستان سمیت دنیا بھر کے مسلمانوں کو برکتوں اور رحمتوں والے ماہ رمضان المبارک کی آمد کا بے صبری سے انتظار ہے۔ معروف غیر ملکی ماہر فلکیات نے رمضان المبارک کے آغاز کی ممکنہ تاریخ بھی بتا دی ہے۔ امارات فلکیاتی سوسائٹی کے ڈائریکٹر ابراہیم الجروان نے حال ہی میں شائع ہونے والی رپورٹ میں بتایا کہ فلکیاتی حساب سے ظاہر ہوتا ہے اس بار رمضان المبارک مارچ 2024ء کے دوسرے ہفتے میں شروع ہونے کا امکان ہے۔

عیدالفطر 10 اپریل کو ہونے کی توقع ہے تاہم سرکاری تاریخوں کا تعین ہونا ابھی باقی ہے۔

دوسری جانب نئے اسلامی ماہ کا چاند نظر آ گیا ہے۔ اس حوالے سے وزارت مذہبی امور نے جماد الثانی کا چاند نظر آنے کا نوٹیفکیشن جاری کردیا ہے۔ جاری کردہ نوٹیفکیشن میں کہا گیا ہے کہ نئے اسلامی ماہ جماد الثانی کا چاند نظر آ گیا ہے، یکم جمادالثانی 1445 ہجری کل بروز جمعہ ہو گا۔ مرکزی رویت ہلال کمیٹی کا اجلاس اسلام آباد میں منعقد ہوا جس کی صدارت چیئرمین رویت ہلال کمیٹی مولانا محمد عبدالخبیر آزاد نے کی۔ ملک بھر سے موصول ہونے والی شہادتوں کو مد نظر رکھ کر نئے ماہ کا اعلان کیا گیا۔