رنگ گورا نہ ہونے پر کریم کمپنی کو 15 لاکھ روپے جرمانہ
بھارت میں رنگ گورا کرنے والی ایک کریم بنانے والی کمپنی پر 11 سال بعد مقدمے کا فیصلہ سامنے آ گیا، جس میں کمپنی کو 15 لاکھ روپے جرمانہ ادا کرنے کا حکم دیا گیا ہے۔
نئی دہلی کے رہائشی نکھل نے 11 سال پہلے ایک کریم کا اشتہار دیکھا، جس میں معروف اداکار شاہ رخ خان شامل تھے۔ اشتہار میں دعویٰ کیا گیا تھا کہ یہ کریم صرف تین ہفتوں میں رنگ گورا کر دے گی۔
نکھل نے یہ کریم خرید کر تین ہفتے تک استعمال کی، لیکن نتیجہ صفر نکلا۔ اس پر نکھل نے 2013 میں کریم بنانے والی کمپنی کے خلاف عدالت میں مقدمہ دائر کر دیا۔
یہ مقدمہ گیارہ سال تک چلتا رہا، اور آخر کار عدالت نے فیصلہ سنایا کہ کمپنی کا اشتہار جھوٹا اور گمراہ کن تھا۔ عدالت نے کمپنی پر 15 لاکھ روپے جرمانہ عائد کیا۔
عدالتی حکم کے مطابق، جرمانے کی رقم میں سے 50 ہزار روپے نکھل کو دیے جائیں گے، جبکہ باقی 14 لاکھ 50 ہزار روپے کنزیومر کورٹ میں جمع ہوں گے۔
اس کے علاوہ، عدالت نے کمپنی کو ہدایت دی کہ وہ نکھل کو قانونی اخراجات کی مد میں مزید 10 ہزار روپے ادا کرے۔
