مائیکروسافٹ کے بانی بل گیٹس نے بھارت کو دنیا کے لیے ایک تجرباتی لیبارٹری قرار دیتے ہوئے کہا ہے کہ اگر مختلف چیزوں کی افادیت بھارت میں ثابت ہو جائے تو وہ دنیا بھر میں بھی مؤثر ثابت ہو سکتی ہیں۔
ایک وائرل ویڈیو کلپ میں بل گیٹس نے ایک سوال کے جواب میں کہا کہ بھارت کی آبادی اور متنوع چیلنجز اسے ایک مثالی تجربہ گاہ بناتے ہیں، جہاں مختلف اشیا اور منصوبوں کی آزمائش کی جا سکتی ہے۔ ان کا کہنا تھا کہ بھارت کی مشکلات اور اس کا تنوع ایک ایسا ماحول فراہم کرتے ہیں جو ان تجربات کے لیے موزوں ہے۔
بل گیٹس نے مزید وضاحت کرتے ہوئے کہا کہ بھارت میں کامیاب ہونے والے پراجیکٹس دنیا کے دیگر ممالک میں بھی کارآمد ہو سکتے ہیں۔ انہوں نے یہ بھی انکشاف کیا کہ ان کے فاؤنڈیشن کا سب سے بڑا غیر امریکی دفتر بھارت میں موجود ہے، اور ان کے پائلٹ منصوبوں کی سب سے بڑی تعداد بھی اسی ملک میں نافذ کی جا رہی ہے۔
بل گیٹس کا یہ بیان سوشل میڈیا پر وسیع پیمانے پر زیر بحث ہے، جہاں مختلف لوگوں نے ان کے الفاظ کو اپنے انداز میں لیا ہے۔
