نئی دہلی(ویب ڈیسک) موسیقی، آتش بازی، رقص اور چمکدار جیکٹس میں مارچ کرنے والے بارات کے روایتی میوزیکل بینڈ کو 63 مرغیوں کی موت کا ذمہ دار ٹھہرایا گیا ہے۔
بھارت کی مشرقی ریاست اڑیسہ میں پولڑی فارم کے مالک رنجیت کمار پریڈا نے میڈیا کو بتایا کہ، بارات کے ساتھ بینڈ اتوار کی آدھی رات سے کچھ دیر پہلے ان کے پولٹری فارم کے قریب سے گزرتے ہوئے "انتہائی اونچی آواز کا شور” کررہا تھا۔
رنجیت کمار پریڈا نے اے ایف پی کو بتایا "میں نے بینڈ آپریٹرز سے کہا کہ وہ اپنی آواز دھیمی کردیں کیونکہ میوزک کا بہت زیادہ شورمرغیوں کو خوفزدہ کر رہا ہے۔ لیکن انہوں نے نہیں سنا اور دولہے کے دوستوں نے مجھ پر چیخنا شروع کردیا "۔
ایک ڈاکٹر نے پریڈا کو بتایا کہ مرغیوں کی موت دل کا دورہ پڑنے سے ہوئی ہے، اور شادی کے منتظمین کی جانب سے معاوضہ دینے سے انکار کے بعد اس نے پولیس میں شکایت درج کرائی۔
ہندوستان ٹائمز کا کہنا ہے کہ اونچی آواز پرندوں میں دل کی بیماری کا خطرہ بڑھاتی ہے۔
کہانی کا اختتام خوش کن تھا سوائے مرغیوں کے کیونکہ بعد میں پولیس نے متحارب فریقوں کو "باہمی طور پر معاملہ حل کرنے” پر راضی کرلیا۔
پولیس اہلکار دروپدی داس نے کہا، ’’ہم نے کوئی کارروائی شروع نہیں کی ہے کیونکہ (پولٹری فارمر) نے شکایت واپس لے لی ہے۔‘‘
