غزہ اور لبنان کے بعد اسرائیل کے یمن پر بھی حملے
یروشلم : اسرائیلی فوج نے تصدیق کی ہے کہ اس نے یمن کے راس عیسیٰ اور حدیدہ کے علاقوں میں حوثی باغیوں کے فوجی ٹھکانوں پر فضائی حملے کیے ہیں۔ اسرائیلی فوج نے ایکس (سابقہ ٹوئٹر) پر جاری کردہ بیان میں بتایا کہ ان حملوں میں لڑاکا طیاروں نے راس عیسیٰ میں موجود حوثیوں کے اہم ٹھکانوں کو نشانہ بنایا۔
بیان میں مزید کہا گیا کہ ان فضائی حملوں کے دوران پاور پلانٹس اور ایک سمندری بندرگاہ کو بھی ہدف بنایا گیا، جو تیل کی درآمدات کے لیے استعمال ہو رہی تھی۔ اسرائیلی فوج کے مطابق، یہ کارروائیاں حوثیوں کی عسکری صلاحیتوں کو کمزور کرنے کے لیے کی گئی ہیں۔
واضح رہے کہ اس سے قبل حوثی باغیوں نے تل ابیب ایئرپورٹ پر اسرائیلی وزیراعظم نیتن یاہو کے طیارے کی لینڈنگ کے دوران راکٹ حملہ کیا تھا، تاہم اسرائیلی دفاعی نظام نے بروقت کارروائی کرتے ہوئے راکٹ کو تباہ کر دیا تھا۔
