فیکٹری ورکر چھٹی کی درخواست مسترد ہونے کے باعث چل بسی
بنکاک :تھائی لینڈ میں ایک انتہائی افسوسناک واقعہ پیش آیا ہے جہاں 30 سالہ فیکٹری ورکر بیماری کے سبب چھٹی کی درخواست مسترد ہونے کی وجہ سے چل بسی۔ غیر ملکی میڈیا کی رپورٹس کے مطابق، بینکاک میں کام کرنے والی خاتون نے آنتوں کے مرض کے سبب ستمبر کے آغاز میں 4 دن کی چھٹی لی تھی۔ جب وہ مکمل طور پر صحت یاب نہ ہو سکیں تو انہوں نے اپنے منیجر سے چھٹی میں مزید توسیع کی درخواست کی جو کہ مسترد کر دی گئی۔
منیجر نے خاتون کو فوری طور پر کام پر واپس آنے اور نیا میڈیکل نوٹ فراہم کرنے کا کہا۔ چھٹی کی درخواست مسترد ہونے اور ملازمت کھونے کے خوف کے سبب خاتون ملازمہ اگلے ہی روز دفتر پہنچ گئی، جہاں صرف 20 منٹ بعد اس کی حالت بگڑ گئی۔ ہنگامی بنیادوں پر اسے اسپتال لے جایا گیا، مگر وہ جانبر نہ ہو سکیں۔
اس واقعے نے کام کی جگہ پر ملازمین کی صحت کی اہمیت کے بارے میں بڑے پیمانے پر تشویش کو جنم دیا ہے۔ بعد ازاں، نجی کمپنی نے اس افسوسناک واقعے پر افسوس کا اظہار کرتے ہوئے کہا کہ انہوں نے تحقیقات کا آغاز کر دیا ہے۔
