یوکرین کی فضائیہ کے سربراہ کو ایف-16 حادثے کے بعد برطرف کر دیا گیا
کیف: یوکرین کے صدر ولادیمیر زیلنسکی نے ایف-16 جنگی طیارے کے حالیہ حادثے کے بعد ایئرفورس کے کمانڈر، مائیکولا اولیشچک، کو برطرف کر دیا ہے۔ صدارتی محل کی جانب سے جاری بیان میں صدر زیلنسکی نے کہا کہ انہوں نے اس فیصلے کے ذریعے ایئرفورس کی قیادت میں تبدیلی کا اقدام اٹھایا ہے۔ صدر نے اپنے بیان میں کہا کہ ان کی فورسز کے تمام پائلٹس کی محنت اور قربانیوں کی قدر کی جاتی ہے۔
ایئرفورس کمانڈر کی برطرفی کی وجوہات تو واضح نہیں کی گئیں، مگر صدر نے اس بات کا ذکر کیا کہ عملے کی حفاظت کو یقینی بنانے اور کمانڈرز کی سطح کو مضبوط کرنے کی ضرورت ہے۔ یوکرین کی فوج نے اعلان کیا ہے کہ جنرل لیفٹننٹ انیتولی کریونوزیخہ کو عارضی طور پر ایئرفورس کے کمانڈر کے طور پر تعینات کیا گیا ہے۔
یہ واقعہ پیر کو پیش آیا جب یوکرین کا ایف-16 طیارہ گر کر تباہ ہو گیا، جس کے نتیجے میں پائلٹ ہلاک ہو گیا۔ ابتدائی اطلاعات کے مطابق، طیارہ روس کی سرحد کے قریب اپنے ہدف کی جانب جا رہا تھا، اور یہ حادثہ روسی حملے کے دوران پیش آیا۔تاہم، یوکرین کی فوج نے حادثے کے بارے میں تفصیلات فراہم کرنے سے گریز کیا ہے اور بتایا کہ تحقیقات میں امریکہ مدد فراہم کر رہا ہے۔
امریکی وزارت دفاع کے عہدیداروں کا کہنا ہے کہ طیارہ حادثہ روسی فائرنگ کی وجہ سے نہیں ہوا بلکہ ممکنہ طور پر میکانیکی ناکامی یا پائلٹ کی غلطی ہو سکتی ہے۔ اس معاملے کی مزید تفتیش جاری ہے۔
