اسماعیل ہنیہ کی موت پر آیت اللہ خامنہ ای کا بدلہ لینے کا عزم

اسماعیل ہنیہ کی موت پر آیت اللہ خامنہ ای کا بدلہ لینے کا عزم

تہران: ایران کے سپریم لیڈر آیت اللہ خامنہ ای اور نومنتخب صدر مسعود پیزشکیان نے حماس کے سربراہ اسماعیل ہنیہ کی مبینہ اسرائیلی حملے میں شہادت پر شدید ردعمل کا اظہار کیا ہے۔

عالمی خبر رساں ادارے کے مطابق، آیت اللہ خامنہ ای نے اسرائیل کو سخت نتائج کی دھمکی دیتے ہوئے کہا ہے کہ اسماعیل ہنیہ کی موت کا بدلہ لینا ایران کے لیے ضروری ہوگیا ہے۔ انہوں نے اس عمل کو ناقابل برداشت قرار دیا اور اسرائیل کو سخت سزا دینے کا عزم ظاہر کیا۔

ایرانی صدر مسعود پیزشکیان نے بھی اسماعیل ہنیہ کو ایک بہادر رہنما قرار دیا اور کہا کہ اسرائیل کی جانب سے کیے گئے بزدلانہ حملے کا بھرپور جواب دیا جائے گا۔ انہوں نے مزید کہا کہ اس حملے کا مقصد ایران کی علاقائی سالمیت اور وقار کو نقصان پہنچانا ہے۔

قطر نے بھی اسماعیل ہنیہ کے قتل کو گھناؤنا جرم قرار دیتے ہوئے کہا کہ یہ حملہ بین الاقوامی اور انسانی قوانین کی کھلی خلاف ورزی ہے اور اس سے خطے میں افراتفری پھیل سکتی ہے۔ قطر نے عالمی برادری سے مطالبہ کیا کہ وہ اسرائیل کے ان لاپرواہ رویوں کا نوٹس لیں اور اسے جوابدہ ٹھہرائیں۔