امریکی حکومت بھی کھربوں ڈالرکے قرضوں تلے ڈوب گئی

امریکی حکومت بھی کھربوں ڈالرکے قرضوں تلے ڈوب گئی
واشنگٹن: امریکہ میں روس کے سفیر اناتولی انتونوف نے کہا ہے کہ امریکی حکومت کا قرضہ تاریخ کی سب سے بلند سطح پر پہنچ چکا ہے، جو اب 35 کھرب ڈالر سے تجاوز کر چکا ہے۔ اس کے ساتھ ہی، امریکہ یوکرین جنگ پر بھاری رقوم خرچ کر رہا ہے۔ روسی سفیر نے اپنے بیان میں کہا کہ یوکرین کے لیے امریکی حکومت کی جانب سے مزید 20 کروڑ ڈالر کی فوجی
امداد کے اعلان کے بعد، یہ پیسہ اگر پرامن مقاصد، ترقیاتی منصوبوں، اور امریکی سماجی و اقتصادی مسائل پر خرچ کیا جاتا تو بہتر ہوتا۔اناتولی انتونوف نے مزید کہا کہ امریکی حکام یوکرین کی جنگ کے حوالے سے
پرانے خیالات میں پھنسے ہوئے ہیں۔ ان کا خیال ہے کہ وہ 1991 کی سرحدوں پر مشتمل یوکرین کو دوبارہ قائم کر سکتے ہیں، حالانکہ اب یہ ممکن نہیں۔ روسی سفیر نے کہا کہ یوکرین کو امریکی ہتھیاروں کی فراہمی جنگ کی صورت حال کو نہیں بدلے گی بلکہ صرف اسے طول دے گی، جس سے عام شہریوں اور فوجیوں کی اموات میں اضافہ
ہو سکتا ہے۔ انہوں نے یہ بھی کہا کہ امریکی اسلحہ سازوں کو اس کی کوئی پرواہ نہیں کیونکہ ان کا مفاد ملکوں اور عوام کے مفادات سے بالاتر ہے۔