ایئر کولر پر جھگڑا، دلہن شدید غصہ میں آگئی ،شادی سے انکار کر دیا

ایئر کولر پر جھگڑا، دلہن شدید غصہ میں آگئی ،شادی سے انکار کر دیا

گرمیوں کے موسم میں ٹھنڈی ہوا سے لطف اندوز ہونا ہر کسی کی خواہش ہوتی ہے اور لوگ اس کے لئے مختلف طریقوں پر عمل کرتے ہیں۔ مڈل کلاس طبقہ زیادہ تر ایئر کولر استعمال کرتا ہے۔ گھر میں ہر کسی کی کوشش ہوتی ہے وہ کولر کے قریب تر ہو کر بیٹھے تاکہ گرمی کی شدت کا کم سے کم احساس ہو۔

گزشتہ دنوں بھارت میں ایک انتہائی عجیب واقعہ پیش آیا جو اس وقت سوشل میڈیا پر ہر طرف گردش کررہا ہے۔

اترپردیش کے ضلع بلیا میں شادی کی تقریب کے دوران دلہن نے اس وقت شادی سے انکار کردیا جب باراتی ایئرکولر کے قریب بیٹھنے آپس میں گتھم گتھا ہو گئے۔جھگڑا شدت اختیار کرنے پر پولیس کو بھی بیچ بچائو کروانے کے لئے مداخلت کرناپڑی۔

جب دولہن کے پاس اس جھگڑے کی خبر پہنچی تو اس نے شادی کرنے سے صاف صاف انکار کر دیا۔ دولہے کے گھر والوں کی جانب سے دولہن کو منانے کی ہر ممکن کوشش کی گئی لیکن دلہن نے ایک نہ مانی۔ پولیس افسر کے مطابق دونوں فریقین میں ثالثی نہ ہونے کے بعد شادی کی تقریب کو منسوخ کر دیا گیا۔