امریکی اچھی طرح سمجھ لے کسی صورت دبائو میں نہیں آئیں گے: نومنتخب ایرانی صدر

امریکی اچھی طرح سمجھ لے کسی صورت دبائو میں نہیں آئیں گے: نومنتخب ایرانی صدر

تہران: ایران کے نو منتخب صدر مسعود پزشکیان کا کہنا ہے کہ امریکہ کو یہ بات اچھی طرح سمجھ لینی چاہیے ایران ’’دباؤ میں ہر گز نہیں آئے گا‘‘۔

ایک ایرانی روزنامے میں شائع ہونے والے بیان میں ایرانی صدر پزشکیان نے واضح کیا کہ ایران جوہری ہتھیاروں کے حصول کیلئے کسی قسم کی کوشش نہیں کررہا۔

69 سالہ ہارٹ سرجن مسعود پزشکیان، جو ایران کے نئے صدر منتخب ہوئے ہیں، نے عملی خارجہ پالیسی کو مضبوط بنانے کا عزم ظاہر کیا ہے۔ انہوں نے کہا کہ وہ بڑی طاقتوں کے ساتھ جاری مذاکرات میں کشیدگی کو کم کرنے کی کوشش کریں گے تاکہ 2015 کے جوہری معاہدے کو دوبارہ زندہ کیا جا سکے۔

پزشکیان نے اپنے بیان میں مزید کہا کہ چین اور روس مشکل وقتوں میں ایران کے ساتھ کھڑے رہے ہیں اور وہ اس دوستی کو انتہائی قیمتی سمجھتے ہیں۔ ایرانی صدر نے کہا کہ روس ایران کا تزویراتی حلیف اور اہم پڑوسی ہے، اور ان کی انتظامیہ دونوں ملکوں کے درمیان تعاون کو بڑھانے اور وسیع کرنے پر کاربند رہے گی۔ انہوں نے یہ بھی کہا کہ تہران حکومت یوکرین میں تنازع کے خاتمے کے حالیہ منصوبوں کی بھرپور حمایت کرے گی۔

مسعود پزشکیان نے کہا کہ ایرانی عوام نے انہیں ایک مضبوط مینڈیٹ دیا ہے تاکہ بین الاقوامی میدان میں بھرپور تعمیری شرکت ہو سکے اور خطے اور عالمی سطح پر ایران کے حقوق، عزت نفس، اور کردار کو یقینی بنایا جا سکے۔