روس کا اپنی فوج سے تمام بھارتیوں کو فارغ کرنے کا فیصلہ

روس کا اپنی فوج سے تمام بھارتیوں کو فارغ کرنے کا فیصلہ

ماسکو: روسی فوج نے اپنے ہاں کام کرنے والے تمام بھارتیوں کو فارغ کرنے کا فیصلہ کیا ہے۔

بھارتی میڈیا کے مطابق یوکرین اور روس کی جنگ کے دوران دو بھارتی شہری ہلاک ہوچکے ہیں جبکہ کئی درجن جنگی علاقے میں پھنسے ہوئے ہیں۔ ان پھنسے ہوئے بھارتیوں کا دعویٰ ہے کہ انہیں دھوکہ دہی کے ذریعے جنگ میں لڑنے کے لیے آمادہ کیا گیا تھا۔

وزیراعظم نریندر مودی نے اپنے دورہ روس کے دوران صدر ولادیمیر پیوٹن کے ساتھ یہ مسئلہ اٹھایا تھا۔ نریندر مودی دو روزہ دورے پر ماسکو میں موجود ہیں، جہاں انہوں نے روسی صدر کی جانب سے دیے گئے عشائیے میں اس موضوع پر بات کی۔

بھارتی میڈیا کے مطابق تقریباً 24 بھارتی شہریوں کو ایجنٹس نے نوکریوں کا جھانسہ دے کر روس لایا اور انہیں یوکرین کے خلاف جنگ لڑنے پر مجبور کیا۔ روسی حکومت نے فوج سے بھارتیوں کو فارغ کرنے اور ان کی وطن واپسی میں سہولت فراہم کرنے پر اتفاق کیا ہے۔