وسطی ایشیا میں ایک طاقتور زلزلے نے میانمار اور تھائی لینڈ میں تباہی مچا دی ہے، جس کے نتیجے میں تقریباً 1002 افراد ہلاک اور 2400 افراد زخمی ہوئے ہیں۔ غیر ملکی خبر رساں ایجنسیوں کے مطابق، سرکاری اعداد و شمار کے مطابق میانمار میں اس زلزلے سے ہلاکتوں کی تعداد 1000 سے تجاوز کر گئی ہے۔
زلزلہ جس کا شدت 7.7 اور زیرِ زمین گہرائی 10 کلومیٹر ریکارڈ کی گئی، کا مرکز میانمار کے شہر منڈالے سے تقریباً 17.2 کلومیٹر کے فاصلے پر واقع تھا۔ اس حادثے کے بعد ریسکیو ٹیمیں فوری طور پر ملبے میں دبے افراد کو نکالنے میں مصروف ہو گئیں، جبکہ امریکی ایجنسیوں نے 10 ہزار سے زائد افراد کی ہلاکت کا خدشہ بھی ظاہر کیا ہے۔
میڈیا رپورٹس کے مطابق، میانمار کے دوسرے بڑے شہر منڈالے میں آنے والے جھٹکے اس قدر شدید تھے کہ وہ 900 کلومیٹر دور تھائی لینڈ کے دارالحکومت بینکاک میں بھی محسوس کیے گئے، جہاں تعمیراتی ڈھانچے اور عمارتیں منہدم ہو گئیں۔ بینکاک کے حکام کا کہنا ہے کہ انہیں تعمیراتی اسٹرکچر میں کریکس پڑنے کی تقریبا 2000 رپورٹس موصول ہوئیں، اور ایک زیر تعمیر بلند عمارت گرنے سے کم از کم 10 افراد ہلاک اور 100 مزدور لاپتہ ہو گئے ہیں۔
مزید برآں، زلزلے کے جھٹکے بھارتی ریاستوں میگھالیہ اور منی پور، بنگلہ دیش کے دارالحکومت ڈھاکا اور چین میں بھی محسوس کیے گئے، جس سے ظاہر ہوتا ہے کہ اس قدرتی آفت کے اثرات وسیع پیمانے پر پھیلے ہوئے ہیں۔حکام اس وقت متاثرہ علاقوں میں نقصان کا تخمینہ لگانے اور ریسکیو آپریشنز کو جاری رکھنے کی کوشش کر رہے ہیں، تاکہ ممکنہ جانی و مالی نقصانات کا بروقت ازالہ کیا جا سکے۔
