شادی شخصیت کو کیسے بدلتی ہے؟ ماہرین کی تحقیق

شادی شخصیت کو کیسے بدلتی ہے؟ ماہرین کی تحقیق

اکثر لوگ یہ کہتے ہیں کہ شادی کے بعد انسان کی شخصیت بدل جاتی ہے، اور تحقیق کے مطابق یہ بات کسی حد تک درست بھی ہے۔ شادی کے بعد مرد اور خواتین دونوں کے رویے اور سوچ میں تبدیلی آتی ہے۔

ماہرین ابھی تک یہ فیصلہ نہیں کر پائے کہ شادی لوگوں کو بدلتی ہے یا لوگ شادی کے لیے خود کو بدلتے ہیں۔ لیکن تحقیقات یہ بتاتی ہیں کہ شادی شدہ زندگی گزارنے کی خواہش رکھنے والے افراد کی شخصیت میں کچھ تبدیلیاں ضرور آتی ہیں۔

یہ بات سمجھنا آسان ہے کیونکہ جب دو لوگ زندگی کے سفر میں ساتھ چلتے ہیں تو ان کے خیالات، عادات اور طرزِ زندگی میں فرق آنا قدرتی ہے۔ ازدواجی زندگی کو خوشگوار بنانے کے لیے صبر اور برداشت ضروری ہے، ورنہ رشتے میں مشکلات پیدا ہو سکتی ہیں۔

جرمنی کی تحقیق

جرمنی میں ایک تحقیق کی گئی جس میں 15 ہزار افراد کا 4 سال تک مشاہدہ کیا گیا۔ ان میں سے 664 افراد نے شادی کی، اور ماہرین نے دیکھا کہ شادی کے بعد ان کی شخصیت میں کیا تبدیلیاں آئیں۔

نتائج کے مطابق شادی شدہ افراد میں نئے تجربات حاصل کرنے اور سماجی سرگرمیوں میں حصہ لینے کا جذبہ تھوڑا کم ہو جاتا ہے۔

امریکی تحقیق

2000 میں امریکا میں کی گئی تحقیق میں درمیانی عمر کی 2 ہزار خواتین کا 6 سے 9 سال تک جائزہ لیا گیا۔ اس دوران کچھ خواتین کی شادی ہوئی اور کچھ کی شادیاں ختم ہو گئیں۔

نتائج سے معلوم ہوا کہ شادی شدہ خواتین کے مقابلے میں طلاق یافتہ خواتین زیادہ سماجی سرگرمیوں میں حصہ لیتی ہیں اور نئے تجربات کی طرف ان کا رجحان زیادہ ہوتا ہے۔

مردوں میں ذمہ داری کا احساس

تحقیقات یہ بھی بتاتی ہیں کہ شادی کے بعد مردوں میں ذمہ داری کا احساس بڑھ جاتا ہے اور وہ ذہنی دباؤ سے باہر نکل آتے ہیں۔

2017 کی ایک تحقیق میں یہ بات سامنے آئی کہ شادی شدہ مرد زیادہ محنت کرتے ہیں اور اپنی زندگی کو بہتر بنانے کی کوشش کرتے ہیں۔

خود پر کنٹرول اور معاف کرنے کی عادت

نیدرلینڈز کی ایک تحقیق میں یہ ثابت ہوا کہ شادی کے بعد لوگ دوسروں کی غلطیوں کو نظرانداز کرنے اور معاف کرنے کی عادت اپنا لیتے ہیں۔ اس کے ساتھ ساتھ وہ خود پر قابو رکھنے میں بھی بہتر ہو جاتے ہیں۔

199 نوبیاہتا جوڑوں کی تحقیق سے یہ معلوم ہوا کہ شادی کے چند ماہ بعد ان میں تحمل اور معاف کرنے جیسی عادتوں میں اضافہ ہوا۔

تحقیقات یہ بھی بتاتی ہیں کہ شادی شدہ زندگی میں لوگ زیادہ مطمئن رہتے ہیں، لیکن اس موضوع پر مزید تحقیق کی ضرورت ہے۔

کیا جوڑے ایک جیسے بن جاتے ہیں؟

ایک تحقیق کے مطابق شادی کے بعد طویل عرصے تک ساتھ رہنے والے جوڑوں کی شخصیت ایک جیسی نہیں ہوتی۔ حقیقت میں ایسا ہوتا ہے کہ ایک جیسی عادات اور سوچ رکھنے والے افراد ایک دوسرے کو شادی کے لیے پسند کرتے ہیں۔

جارجیا یونیورسٹی کی تحقیق میں شادی کے بعد جوڑوں کی شخصیت کا جائزہ لیا گیا۔ تحقیق کے مطابق شادی کے بعد مردوں میں ذمہ داری بڑھ جاتی ہے اور خواتین میں غصہ اور ذہنی دباؤ کم ہو جاتا ہے۔

تاہم، وقت گزرنے کے ساتھ مردوں کا سماجی میل جول کم ہو جاتا ہے اور جوڑوں کے درمیان ایک دوسرے کے لیے برداشت میں بھی کمی آ سکتی ہے۔

تحقیقات سے یہ بات ثابت ہوتی ہے کہ شادی کے بعد شخصیت میں کچھ تبدیلیاں آتی ہیں، لیکن انسان کی شخصیت مکمل طور پر نہیں بدلتی۔