بارش کی پیاس میں تڑپتا دنیا کا خشک ترین شہر
آریکا، چلی کا ایک ساحلی شہر، دنیا کے خشک ترین شہروں میں سے ایک ہے، جہاں بارش کا ہونا نہ ہونے کے برابر ہے۔ یہ شہر چلی کے شمال میں صحرائے ایٹاکاما کے ساتھ واقع ہے، جو کہ خود دنیا کا خشک ترین صحرا ہے۔ صحرائے ایٹاکاما کے کچھ حصے ایسے ہیں جہاں صدیوں سے بارش نہیں ہوئی، اور اسی وجہ سے آریکا بھی کم و بیش اسی کیفیت سے دوچار ہے۔
آریکا کی جغرافیائی اور موسمیاتی خصوصیات اس کی خشکی کی بنیادی وجہ ہیں۔ اس شہر میں اوسطاً سالانہ صرف 0.761 ملی میٹر بارش ہوتی ہے۔ اس جگہ ہوا کے اندر نمی کی مقدار تو موجود ہوتی ہے، لیکن یہ زمین تک نہیں پہنچ پاتی۔ اس کی وجہ ایک یہ بھی ہے کہ مغربی ہوائیں جو فضا میں موجود نمی کو لے کر آتی ہیں، وہ اسے قریبی پہاڑوں میں ہی برسا دیتی ہیں۔ نتیجتاً، شہر میں بارش نہیں ہوتی اور یہ خشک رہتا ہے۔
بحر الکاہل کی سرد Humboldt Current بھی اس خطے کی خشکی میں اہم کردار ادا کرتی ہے۔ یہ کرنٹ جنوبی امریکا کے مغربی ساحلی علاقوں سے چلی کے جنوب تک بہتی ہے اور اس کے نتیجے میں ہوا سرد اور خشک رہتی ہے، جس سے بارش کا امکان مزید کم ہوجاتا ہے۔ اسی طرح، صحرائے ایٹاکاما کی قربت بھی آریکا کو بارش سے محروم رکھتی ہے۔
اس شدید خشک موسم کے باوجود، آریکا کے باشندے زندگی گزارنے کے لیے مختلف طریقے اپنائے ہوئے ہیں۔ یہاں کے لوگ سمندری پانی کو میٹھا بنا کر پینے اور دیگر ضروریات کے لیے استعمال کرتے ہیں۔ اس کے علاوہ، دیگر علاقوں سے بھی پانی درآمد کیا جاتا ہے۔ بارش کے پانی کو ذخیرہ کرنے کا مؤثر نظام بھی شہر میں موجود ہے تاکہ اگر کبھی بارش ہو تو اس کا پانی ضائع نہ ہو۔
آریکا کی یہ منفرد جغرافیائی اور موسمی حالت اسے دنیا کا خشک ترین شہر بنا دیتی ہے، جہاں لوگ مشکل حالات کے باوجود زندہ دلی کے ساتھ زندگی گزار رہے ہیں۔
