میٹا کی نئی ٹیکنالوجی، اسمارٹ فونز کی جگہ لینے کو تیار

میٹا کی نئی ٹیکنالوجی، اسمارٹ فونز کی جگہ لینے کو تیار

میٹا کی جانب سے طویل عرصے سے اسمارٹ فونز کے متبادل کے لیے اگیومینٹڈ رئیلٹی (AUGMENTED REALITY – AR) ٹیکنالوجی پر مبنی اسمارٹ گلاسز کی تیاری پر کام کیا جا رہا ہے۔ اب اس حوالے سے کمپنی نے اپنی پہلی پیشرفت کی ہے اور اپنا پہلا اے آر اسمارٹ گلاس "اورین” متعارف کرایا ہے۔

میٹا نے میٹا کنکٹ نامی کانفرنس کے موقع پر اپنے ‘فل ہوگرافک’ اے آر گلاسز کو پیش کیا۔ یہ گلاسز ہلکے وزن کے ہیں اور دیکھنے میں عام گلاسز جیسے لگتے ہیں، جس سے پہننے والوں کی آنکھیں، چہرہ اور تاثرات دیکھنا ممکن ہے۔

میٹا نے پانچ سال پہلے انکشاف کیا تھا کہ وہ ہولوگرافک اسمارٹ گلاسز پر کام کر رہی ہے، مگر حقیقت یہ ہے کہ کمپنی نے اس منصوبے پر ایک دہائی قبل کام شروع کیا تھا۔ اورین کے بارے میں اس کا دعویٰ ہے کہ یہ اب تک تیار ہونے والے بہترین اے آر گلاسز ہیں۔
گلاسز کی خصوصیات

ان گلاسز کے اندر پراجیکٹرز موجود ہیں جو ہولوگرامز کو گلاسز میں ڈسپلے کرتے ہیں۔ کمپنی کا کہنا ہے کہ یہ گلاسز ایسا ڈیجیٹل تجربہ فراہم کرتے ہیں جو اب تک اسمارٹ فون اسکرین تک محدود تھا۔ آرٹیفیشل انٹیلی جنس (AI) ٹیکنالوجی کے ذریعے صارفین کو اپنی اردگرد کی دنیا کے بارے میں مزید بہتر تفصیلات ملتی ہیں۔

کمپنی نے بتایا کہ صارفین اورین کے ذریعے فریج کے اندر دیکھ سکیں گے اور میٹا اے آئی کی جانب سے اس میں موجود سامان کو مدنظر رکھ کر کھانے کی ترکیب کی تجویز دی جائے گی۔ اسمارٹ گلاسز کے ذریعے آپ ویڈیو کالز بھی کرسکیں گے جبکہ میسنجر اور واٹس ایپ پر میسجز بھی بھیج سکیں گے۔

میٹا نے مزید بتایا کہ متعدد ایپس جیسے یوٹیوب اور دیگر کے ہولوگرافک ورژنز بھی دستیاب ہوں گے۔ اسمارٹ گلاسز کے ساتھ ایک بریسلیٹ بھی دیا جائے گا جسے gesture control کرنے کے لیے پہننا ضروری ہوگا۔
دستیابی اور مستقبل کی توقعات

کمپنی کے مطابق، فی الحال یہ اسمارٹ گلاسز عام فروخت کے لیے پیش نہیں کیے جا رہے بلکہ یہ محدود افراد کو دستیاب ہوں گے تاکہ ان کو مزید بہتر بنانے کے بعد سب کے لیے پیش کیا جائے۔ 2023 میں ایک رپورٹ میں بتایا گیا تھا کہ میٹا کی جانب سے پہلے اے آر گلاسز 2027 میں فروخت کے لیے پیش کیے جائیں گے۔

جولائی 2024 میں میٹا کے چیف ایگزیکٹو مارک زکربرگ نے پیشگوئی کی تھی کہ مستقبل میں ہر فرد کی آنکھوں پر آرٹیفیشل انٹیلی جنس (AI) ٹیکنالوجی سے لیس اسمارٹ گلاسز ہوں گے، اور انہوں نے دعویٰ کیا کہ اسمارٹ گلاسز کا استعمال ایک نیا ٹرینڈ بن جائے گا۔ یعنی وہ اس ڈیوائس کو اسمارٹ فونز کا متبادل تصور کرتے ہیں۔

یہ بات قابل ذکر ہے کہ میٹا کی جانب سے 2021 میں اپنے اولین اسمارٹ گلاسز کو Ray-Ban نامی کمپنی کے اشتراک سے تیار کیا گیا تھا۔