پی ایس ایل 9 کا شیڈیویل تبدیل کردیا گیا ہے۔ تفصیلات کے مطابق پی ایس ایل شیڈول میں تبدیلی ملک میں عام انتخابات کی وجہ سے کی گئی ہے۔ نئےشیڈول کے مطابق پاکستان سپر لیگ کے سیزن 9 کی افتتاحی تقریب 13 فروری کو لاہور میں ہوگی جبکہ لیگ کا فائنل میچ 19 مارچ 2024 کو کراچی میں کھیلا جائے گا۔
خیال رہے کہ اس سے قبل پی ایس ایل سیزن 9 کے آغاز کی تاریخ 8 فروری مقرر کی گئی تھی تاہم الیکشن کمیشن کی جانب سے انتخابات کی تاریخ بھی اسی روز مقرر کی گئی ہے جس کے باعث انتظامیہ نے شیڈول تبدیل کردیا ہے۔
دوسری جانب ترجمان الیکشن کمیشن کے مطابق لاہور ہائیکورٹ کے حکم کے مطابق الیکشن کمیشن کی طرف سے جاری کردہ نوٹیفکیشن 11 دسمبر کی معطلی کے بعد الیکشن کمیشن آف پاکستان نے ڈسٹرکٹ ریٹرننگ آفیسرز اور ریٹرننگ آفیسرز کی جاری ٹریننگ کو روک دیا ہے۔
تفصیلات کے مطابق لاہور ہائیکورٹ نے پنجاب میں عام انتخابات بیوروکریسی سے کروانے کا الیکشن کمیشن کی جانب سے جاری کردہ نوٹیفکیشن معطل کر دیا ہے۔ لاہور ہائی کورٹ کے جسٹس علی باقر نجفی نے پاکستان تحریک انصاف کی درخواست پر محفوظ فیصلہ سنا دیا ہے اور پنجاب میں انتخابات ایگزیکٹو سے کروانے کیخلاف درخواستوں پر لارجر بینچ تشکیل دینے کی سفارش کرتے ہوئے فائل چیف جسٹس لاہور ہائیکورٹ کو ارسال کر دی ہے۔
