اسد شفیق نے کرکٹ سے ریٹائرمنٹ کا اعلان کر دیا

اسد شفیق نے کرکٹ سے ریٹائرمنٹ کا اعلان کر دیا ہے۔ تفصیلات کے مطابق پاکستان کیلئے 77 ٹیسٹ، 60 ون ڈے اور 10 ٹی ٹونٹی میچز کھیلنے والے اسد شفیق نے تمام فارمیٹس سے ریٹائرمنٹ لےلی ہے۔ قومی کرکٹر اسد شفیق نے بتایا ہے کہ وہ پیٹرن ٹرافی میں مزید تین میچز کھیلنے کے بعد ڈومیسٹک کرکٹ سے ریٹائر ہو جائیں گے۔

کراچی میں ڈوپیسٹک میچ کے بعد پریس کانفرنس کرتے ہوئے اسد شفیق نے کہا ہے کہ میں اب وہ جوش محسوس نہیں کررہا ہوں جو شروع میں تھا، پورے کیرئیر میں جن لوگوں نے سپورٹ کیا ان کا شکریہ ادا کرتا ہوں، پاکستان کرکٹ بورڈ نے سلیکشن کمیٹی میں شمولیت کی پیشکش کی ہے، خود کو خوش قسمت سمجھتا ہوں ہوں کہ تینوں فارمیٹ میں پاکستان کی نمائندگی کی۔

اسد شفیق نے پریس کانفرنس کے دوران مزید کہا کہ 2010 میں سپاٹ فکسنگ کے واقعے کے بعد کا وقت کافی مشکل تھا، عوام کا کرکٹ پر اعتماد بحال کرانا اہم تھا، کسی کیلئے بھی ملک کی نمائندگی کرنا بہت اعزاز کی بات ہوتی ہے، مجھ پر ریٹائرمنٹ کیلئے کوئی دباؤ نہیں تھا، یہ میرا اپنا فیصلہ ہے، کرکٹ سے محبت ہے لیکن عمر بڑھنے کے ساتھ ساتھ جوش ختم ہوتا جاتا ہے، جب ٹیسٹ کے نمبر ون پلئیر بنا تھا وہ یادگار ترین لمحہ تھا، ورلڈ کپ سیمی فائنل کھیلنا بھی یادگار تھا، کوئی ایسا لمحہ نہیں جس کو کہوں کہ مایوس کن رہا ہو۔