بنگلہ دیش کی تاریخی فتح، بھارت کو ہرا کر مسلسل دوسرا انڈر 19 ایشیا کپ جیت لیا

بنگلہ دیش نے انڈر 19 ایشیا کپ کے فائنل میں بھارت کو 59 رنز سے شکست دے کر مسلسل دوسری مرتبہ چیمپیئن بننے کا اعزاز حاصل کر لیا۔

فائنل مقابلہ دبئی میں کھیلا گیا، جہاں بنگلہ دیشی ٹیم نے پہلے بیٹنگ کرتے ہوئے 50 اوورز میں مجموعی طور پر 198 رنز بنائے۔ ریزان حسین نے شاندار بلے بازی کرتے ہوئے 47 رنز کی اننگز کھیلی اور اپنی ٹیم کے سب سے نمایاں بلے باز رہے۔ بھارت کی جانب سے یودھاجیت گوہا، چیتن شرما، اور ہاردک راج نے دو، دو وکٹیں حاصل کیں۔

ہدف کے تعاقب میں بھارتی ٹیم کی کارکردگی مایوس کن رہی اور وہ 36ویں اوور میں 139 رنز پر آل آؤٹ ہوگئی۔ بنگلہ دیشی بولرز اقبال حسین اور عزیز الحاکم نے شاندار کارکردگی کا مظاہرہ کرتے ہوئے تین، تین وکٹیں حاصل کیں اور بھارتی بلے بازوں کو دباؤ میں رکھا۔

شاندار کارکردگی دکھانے والے اقبال حسین ایمون کو پلیئر آف دی میچ اور ٹورنامنٹ کا بہترین کھلاڑی قرار دیا گیا۔