چیمپئنز ٹرافی کا شیڈول اگلے 48 گھنٹوں میں متوقع، آئی سی سی کا اجلاس آج ہوگا

چیمپئنز ٹرافی کا شیڈول اگلے 48 گھنٹوں میں متوقع، آئی سی سی کا اجلاس آج ہوگا

گزشتہ روز پاکستان کی اہم شرط مان لی گئی، جس کے بعد توقع کی جا رہی ہے کہ چیمپئنز ٹرافی کے شیڈول کا اعلان 48 گھنٹوں میں ہو جائے گا۔ نئے معاہدے کے تحت آئندہ تین سال تک پاکستان اور بھارت ایک دوسرے کے ملک میں آئی سی سی ایونٹس نہیں کھیلیں گے۔ ان میچز کے لیے کسی تیسرے ملک کا انتخاب کیا جائے گا۔

چیمپئنز ٹرافی میں بھارت اپنے میچز دبئی میں کھیلے گا، جبکہ بھارت میں ہونے والے ٹی ٹوئنٹی ورلڈ کپ میں پاکستان کے میچز بھی نیوٹرل وینیو پر ہوں گے۔ چیئرمین پی سی بی محسن نقوی نے وعدہ کیا تھا کہ تمام فیصلے برابری کی بنیاد پر ہوں گے۔

یاد رہے کہ آئی سی سی چیمپئنز ٹرافی 19 فروری سے شروع ہوگی، جس کی میزبانی پاکستان کرے گا۔ تاہم، بھارت نے روایتی ہٹ دھرمی دکھاتے ہوئے اپنی ٹیم کو پاکستان بھیجنے سے انکار کر دیا ہے۔