بھارتی کھلاڑی نے 28 گیندوں پر ریکارڈ سنچری بناکر دھوم مچادی

بھارتی کرکٹر ابھیشیک شرما نے ڈومیسٹک ٹی 20 ٹورنامنٹ سید مشتاق علی ٹرافی میں شاندار کارکردگی دکھائی اور صرف 28 گیندوں پر سنچری بنائی۔ پنجاب کی ٹیم کی نمائندگی کرتے ہوئے، ابھیشیک نے میگھالیا کے خلاف 29 گیندوں پر 106 رنز کی طوفانی اننگز کھیلی۔

میگھالیا کے 143 رنز کے ہدف کا تعاقب کرتے ہوئے، بائیں ہاتھ کے بیٹر ابھیشیک نے 11 چھکوں اور 8 چوکوں کی مدد سے سنچری مکمل کی۔ ان کی زبردست اننگز کی بدولت پنجاب نے یہ ہدف صرف 9.3 اوورز میں حاصل کر لیا۔

سنچری کے بعد اپنی بات میں ابھیشیک نے کہا کہ وہ مثبت سوچ کے ساتھ کھیلنے آئے تھے اور کھیل سے لطف اندوز ہونا چاہتے تھے۔ انہوں نے مزید کہا کہ انہیں یقین تھا کہ وہ یہ کارکردگی دکھا سکتے ہیں، بس صحیح موقع کا انتظار تھا۔

ابھیشیک شرما بھارت کے لیے 12 ٹی 20 انٹرنیشنل میچز بھی کھیل چکے ہیں اور انڈین پریمیئر لیگ میں سن رائزرز حیدرآباد کا حصہ ہیں۔ یاد رہے کہ اس سے پہلے اسی ٹورنامنٹ میں گجرات کے ارویل پٹیل نے بھی 28 گیندوں پر سنچری بنائی تھی۔

ٹی 20 فارمیٹ کی تیز ترین سنچری کا ریکارڈ اس وقت استونیا کے ساحل چوہان کے پاس ہے، جنہوں نے قبرص کے خلاف 27 گیندوں میں سنچری بنائی تھی۔