پاکستان کرکٹ بورڈ پی سی بی نے شو کاز نوٹس کا جواب ملنے کے بعد سٹار فاسٹ بولر حارث رؤف کے خلاف انضباطی کارروائی نہ کرنے کا فیصلہ کیا ہے۔تفصیلات کے مطابق حارث رؤف کی سینٹرل کنٹریکٹ میں بھی تنزلی نہیں کی جائے گی البتہ سلیکٹرز اور پاکستان کرکٹ بورڈ کی انتظامیہ نے واضح کردیا ہے کہ مستقبل میں انہیں ڈومیسٹک فرسٹ کلاس میں لازمی شرکت کرنا ہوگی۔
حارث رؤف نے پاکستان کرکٹ بورڈ کو یقین دلایا ہے کہ وہ ڈپارٹمنٹس کے فرسٹ کلاس ٹورنامنٹ میں شرکت کریں گے, حارث رؤف کو پاکستان کرکٹ بورڈ نے بگ بیش کےدوران 21 دن میں پانچ میچوں کے لیے این او سی جاری کیا تھا۔ ذرائع کا کہنا ہے کہ حارث رؤف کو پاکستان کرکٹ بورڈ نے این او سی دینے سے قبل شو کاز نوٹس جاری کیا تھا۔
پی سی بی کو حارث رؤف کی جانب سے شوکاز نوٹس کا جواب موصول ہوگیا ہے جس میں حارث رؤف نے اعتراف کیا ہے کہ ان کی فٹنس اچھی نہیں تھی اس لیے انہوں نے ٹیسٹ میچز کھیلنے سے منع کردیا تھا۔ پی سی بی نے انہیں مستقبل میں ریڈ بال کھیلنے کی ہدایت کر رکھی ہے، وہ بگ بیش کیلئے آسٹریلیا پہنچ گئے ہیں لیکن آرام کی غرض سے پہلا میچ نہیں کھیلیں گے۔
