پاکستان آسٹریلیا کے خلاف ٹیسٹ سیریز کھیلنے جا رہا ہے اور شان مسعود پاکستانی ٹیسٹ ٹیم کی قیادت کریں گے۔ آج انہوں نے اس حوالے سے قذافی سٹیڈیم میں پریس کانفرنس کی اور اہم اعلانات کیے۔ شان مسعود نے کہا کہ امام الحق اور عبداللہ شفیق گزشتہ ایک سال سے اوپن کر رہے ہیں اور انہوضں نے اچھی کارکردگی دکھائی ہے اس لیے ہماری ٹیم کے اوپنر عبداللہ اور امام ہی ہوں گے۔
ٹیسٹ کپتان نے مزید کہا کہ اظہر علی کی ریٹائرمنٹ کےبعد سے میں نے ڈومیسٹک اور انٹرنیشنل میچز میں تیسرے نمبر پر کھیلا ہے اور میں اس سے مطمئن ہوں اس لیے مین تیسرے نمبر پر ہی کھیلوں گا۔ شان مسعود سے بابر اعظم کی پوزیشن کے بارے میں سوال کیا گیا کہ وہ کس نمبر پر کھیلیں گے تو شان مسعود نے کہا کہ بابر پہلے چوتھے نمبر پر کھیلتے رہے ہیں اور وہ تیم کے سب سے مضبوط کھلاڑی ہیں، ٹیم مضبوط کھلاڑی کے گرد ہی بنائی جاتی ہے اس لیے کوئی بھی بابراعظم کی پوزیشن کو پریشان نہیں کرے گا۔ بابراعظم چوتھے نمبر پر ہی کھیلیں گے، اسی میں ٹیم کا فائدہ ہے۔
شان مسعود نے مزید بتایا کہ آسٹریلیا ٹیسٹ سیریز کے لیے پاکستانی سکواڈ شان مسعود (کپتان)، عامر جمال، عبداللہ شفیق، ابرار احمد، بابر اعظم، فہیم اشرف، حسن علی، امام الحق، خرم شہزاد، میر حمزہ، محمد رضوان (وکٹ)، محمد وسیم جونیئر، نعمان علی، صائم ایوب، سلمان علی آغا، سرفراز احمد، سعود شکیل اور شاہین شاہ آفریدی پر مشتمل ہے۔
