قومی کرکٹ ٹیم کے نائب کپتان اور آل راؤنڈر شاداب خان تاحال انجری سے پوری طرح فٹ نہیں ہوسکے ہیں۔ میڈیا رپورٹ کے مطابق شاداب خان 1 سال کے دوران تیسری بار کنکشن انجری کا شکار ہوئے ہیں، ان کی انجری کا آج جائزہ لیا جائے گا۔ اگر شاداب خان فٹ نہ ہوسکے تو ان کی جگہ ابرار احمد کو ٹیم میں شامل کیے جانے کا امکان ہے۔
یاد رہے کہ ہفتے کے روز بنگلورو میں پاکستان اور نیوزی لینڈ کا آمنا سامنا ہوگا، شیڈیول کے مطابق میچ ساڑھے10 بجے شروع ہوگا البتہ ہفتے کی دوپہر بنگلورو میں بارش کی پیشگوئی بھی کی گئی ہے۔
نیوزی لینڈ کی کرکٹ ٹیم کے کئی کھلاڑی بھی انجری کا شکار ہیں اور اس فہرست میں اب فاسٹ بولر میٹ ہنری کا بھی اضافہ ہو گیا ہے جو کہ جنوبی افریقا کے خلاف میچ میں ہیمسٹرنگ انجری کا شکار ہو گئے تھے۔ ان کو کور کرنے کیلئے فاسٹ بولر کائل جیمی سن کو بھارت بلا لیا گیا ہے۔کیوی کھلاڑی جمی نیشم بھی کلائی پر گیند لگنے کے باعث انجری کا شکار ہو گئے تھے مزید برآں لوکی فرگوسن، مارک چیپمین اور کین ولیمسن پہلے ہی انجریز کا شکار ہیں۔
دوسری جانب پاکستان کو سیمی فائنل میں رسائی کیلئے نیوزی لینڈ سے بڑے مارج سے جیت کی ضرورت ہے تاہم بارش کی صورت میں دونوں ٹیموں کو ایک ایک پوائنٹ دیا جائے گا اور اگر ایسا ہوتا ہے تو پاکستان کے سیمی فائنل میں پہنچنے کے چانسز انتہائی کم ہو جائیں گے۔
