پی ایس ایل 2024 کی تاریخ سامنے آگئی ہے۔ پی ایس کا نواں ایدیشن 8 فروری سے 24 مارچ تک منعقد ہو گا۔ تفصیلات کے مطابق پاکستان سپر لیگ پی ایس ایل کا نواں ایڈیشن 8 فروری 2024 سے 24 مارچ 2024 تک منعقد کیا جائے گا۔ پی ایس ایل 9 کیلئے غیر ملکی کرکٹرز کی رجسٹریشن کا عمل بھی شروع کردیا گیا ہے۔ پاکستان کرکٹ بورڈ کی جانب سے جاری کردہ اعلامیے میں بتایا گیا ہے کہ پاکستانی کرکٹرز کی کیٹگریز کی تجدید کو بھی جلد حتمی شکل دے دی جائے گی، جس کے بعد ٹریڈ اور کھلاڑیوں کو برقرار رکھنے کا مرحلہ شروع ہو جائے گا۔
پاکستان کرکٹ بورڈ کے مطابق کھلاڑیوں کی ٹریڈ اور کھلاڑیوں کو برقرار رکھنے کا عمل مکمل ہونے کے بعد دسمبر 2023 کے وسط میں نیشنل ٹی ٹوئنٹی کے اختتام پر پی ایس ایل 9 کا پلیئر ڈرافٹ شیڈول کیا جائے گا۔ خیال رہے کہ نیشنل ٹی 20 کا فائنل 10 دسمبر 2023 کو کراچی میں کھیلا جائے گا۔
دوسری جانب پی ایس ایل کی ٹیم ملتان سلطانز کی میجمنٹ نے ایک اور خاتون کوچ کی خدمات حاصل کرلی ہیں۔ فرنچائز کی جانب سے مداحوں کو آگاہ کیا گیا ہے کہ ملتان سلطانز نے انگلینڈ کی سابق کرکٹر ایلیکس ہارٹلے کو ٹیم کی اسسٹنٹ اسپن بولنگ کوچ مقرر کر دیا ہے۔ یاد رہے کہ ایلیکس ہارٹلے نے انگلش ٹیم کی نمائندگی کرتے ہوئے 28 ون ڈے اور 4 ٹی20 مقابلوں میں شرکت کی ہے۔
