سری لنکا کی تاریخی کامیابی،بھارت کے خلاف 110 رنز سے
فتح
کولمبو:سری لنکا نے بھارت کو تیسرے اور آخری ایک روزہ میچ میں 110 رنز سے شکست دے کر 27 سال بعد دوطرفہ سیریز جیتنے کا اعزاز حاصل کیا۔ کولمبو کے آر پریما داسا اسٹیڈیم میں منعقدہ میچ میں سری لنکا نے ٹاس جیت کر پہلے بیٹنگ کرنے کا انتخاب کیا اور 50 اوورز میں 7 وکٹوں کے نقصان پر 248 رنز کا مجموعہ بنایا۔
سری لنکا کی اننگز کی خاص بات اوِشکا فرنینڈو کی 96 رنز کی شاندار اننگز تھی، جس میں انہوں نے بھارتی بولرز کو کافی مشکلات میں ڈالا۔ کوشل مینڈس نے بھی بہترین کھیل کا مظاہرہ کرتے ہوئے 59 رنز بنائے۔ دیگر بلے بازوں میں پاتھم نسانکا نے 45، چارتھ اسالانکا نے 10، جنیتھ لیاناگے نے 8، دونیتھ ویلالاگے نے 2 اور سدیرا سماراوکرما بغیر کوئی رن بنائے آؤٹ ہوئے۔ آخر میں کمینڈو مینڈس 23 اور مہیش ٹھیکشانا 3 رنز کے ساتھ ناٹ آؤٹ رہے۔
بھارتی بولرز میں ریان پراگ نے 3 وکٹیں حاصل کیں جبکہ کلدیپ یادو، واشنگٹن سندر، اکشر پٹیل اور محمد سراج نے ایک ایک وکٹ حاصل کی۔
248 رنز کے ہدف کا تعاقب کرتے ہوئے، بھارت کی مضبوط بیٹنگ لائن بری طرح ناکام رہی اور پوری ٹیم 27 اوورز میں صرف 138 رنز بنا کر آؤٹ ہوگئی۔ بھارتی ٹیم کے سات کھلاڑی ڈبل فیگر میں بھی داخل نہ ہو سکے اور کپتان روہت شرما 35 رنز بنا کر نمایاں رہے۔
سری لنکا کے دونیتھ ویلالاگے نے تباہ کن بولنگ کرتے ہوئے 5 وکٹیں حاصل کیں۔ ان کے علاوہ مہیش ٹھیکشانا اور جیفری وینڈرسے نے 2، 2 جبکہ اسیتھا فرنینڈو نے ایک وکٹ حاصل کی۔
یوں سری لنکا نے 1-2 سے سیریز جیت کر 27 سال بعد بھارت کے خلاف ایک روزہ سیریز اپنے نام کرلی۔ اس تاریخی کامیابی کے بعد سری لنکن ٹیم اور شائقین میں خوشی کی لہر دوڑ گئی اور اس کو ایک بڑی کامیابی کے طور پر منایا گیا۔ اس فتح نے سری لنکن کرکٹ کے لیے ایک نئی امید اور حوصلہ پیدا کیا ہے کہ وہ آئندہ چیلنجز میں بھی بہترین کارکردگی کا مظاہرہ کر سکیں گے۔
