چیمپئنز ٹرافی 2025: افغان کرکٹرز کی شرکت کی تصدیق، افواہوں کی تردید

چیمپئنز ٹرافی 2025: افغان کرکٹرز کی شرکت کی تصدیق، افواہوں کی تردید

افغانستان کے دو اہم کرکٹرز، محمد نبی اور وکٹ کیپر رحمان اللہ گرباز، نے چیمپئنز ٹرافی 2025 کے لیے پاکستان آنے کی تصدیق کردی ہے۔ ان دونوں نے سوشل میڈیا پر جاری افواہوں کی تردید کرتے ہوئے کہا ہے کہ وہ اس ٹورنامنٹ کے لیے پاکستان کا دورہ کریں گے۔

گزشتہ دنوں انٹرنیشنل کرکٹ کونسل (آئی سی سی) کی سالانہ میٹنگ کے دوران افغانستان کرکٹ بورڈ (اے سی بی) کے چیئرمین واعظ اشرف اور نصیب خان نے پاکستان کرکٹ بورڈ (پی سی بی) کے چیئرمین محسن نقوی سے ملاقات میں ٹیم پاکستان بھیجنے کی یقین دہانی کرائی تھی۔

محمد نبی نے سوشل میڈیا پر جاری اپنے پیغام میں شائقین کو مخاطب کرتے ہوئے کہا کہ وہ جھوٹی خبروں اور افواہوں پر کان نہ دھریں۔ انہوں نے مزید کہا کہ افواہوں میں کوئی حقیقت نہیں اور افغان ٹیم چیمپئنز ٹرافی میں حصہ لینے کے لیے پاکستان جائے گی۔

رحمان اللہ گرباز نے بھی اس کی تصدیق کرتے ہوئے کہا کہ افغانستان کی ٹیم پاکستان میں ہونے والی چیمپئنز ٹرافی 2025 میں بھرپور شرکت کرے گی اور اپنی بہترین کارکردگی کا مظاہرہ کرے گی۔

قبل ازیں سوشل میڈیا پر غیر مصدقہ اکاؤنٹس کے ذریعے خبریں پھیلائی جا رہی تھیں کہ بھارتی ٹیم کی طرح افغان ٹیم بھی سیکیورٹی خدشات کے باعث پاکستان نہیں آئے گی۔ تاہم افغان کرکٹ بورڈ اور کھلاڑیوں نے ان افواہوں کی تردید کرکے شائقین کو یقین دلایا ہے کہ وہ چیمپئنز ٹرافی کے لیے پاکستان کا دورہ ضرور کریں گے۔