بشریٰ بی بی انسداد دہشت گردی عدالت میں پیش، 32 مقدمات میں ضمانتیں منظوری

بشریٰ بی بی انسداد دہشت گردی عدالت میں پیش، 32 مقدمات میں ضمانتیں منظوری

راولپنڈی:تحریک انصاف کے بانی عمران خان کی اہلیہ، بشریٰ بی بی، انسداد دہشت گردی کی عدالت میں پیش ہو گئیں۔
سابق خاتون اول بشریٰ بی بی انسداد دہشت گردی کی خصوصی عدالت میں 32 مقدمات کے حوالے سے پیش ہوئیں، جہاں ان کے وکیل محمد فیصل ملک نے ان کی ضمانت کی درخواستیں جمع کروائیں۔
عدالت میں پیشی کے دوران بشریٰ بی بی کی گاڑی کو خصوصی اجازت کے تحت احاطہ عدالت میں داخل کیا گیا۔ اس موقع پر پی ٹی آئی کی رہنما سیمابیہ طاہر اور دیگر پارٹی رہنما بھی عدالت میں موجود تھے۔ وکیل فیصل چوہدری ایڈووکیٹ نے بھی ان کا ساتھ دیا۔
انسداد دہشت گردی عدالت کے جج امجد علی شاہ نے بشریٰ بی بی کی 32 مقدمات میں عبوری ضمانتیں منظور کر لیں، جس کے بعد وہ عدالت سے روانہ ہو گئیں۔
عدالت نے حکم دیا کہ بشریٰ بی بی کو 24 سے 27 نومبر کے احتجاج کے کسی بھی مقدمے میں 13 جنوری تک گرفتار نہ کیا جائے۔ جج نے تمام مقدمات کے تفتیشی افسران کو نوٹس جاری کرتے ہوئے مقدمات کا مکمل ریکارڈ پیش کرنے کا حکم دیا۔
مزید برآں، جج امجد علی شاہ کچھ دیر بعد جی ایچ کیو حملہ کیس کی سماعت کے لیے اڈیالہ جیل جائیں گے۔