اسلام آباد:سابق وفاقی وزیر خزانہ اور عوام پاکستان پارٹی کے رہنما مفتاح اسماعیل نے کہا ہے کہ مولانا فضل الرحمان ایک سے ڈیڑھ سال کے لیے وزیراعظم بن سکتے ہیں۔
انہوں نے کہا کہ مذاکرات کے دوران سیاسی ماحول میں کچھ سکون آتا ہے، احتجاج اور تصادم کم ہو جاتے ہیں، اس لیے مذاکرات کا ہونا ضروری ہے۔
مفتاح اسماعیل نے مزید کہا کہ پاکستان میں سیاسی حل صرف انتخابات کے ذریعے ممکن ہے، عوام کی رائے لینا ضروری ہے۔ ان کا کہنا تھا کہ مولانا فضل الرحمان جیسا قدآور سیاستدان ملک میں بہت کم ہے، اور وہ مختصر مدت کے لیے وزیراعظم بننے کے اہل ہیں۔
سابق وزیر خزانہ نے حکومت کی کارکردگی پر بھی تنقید کی۔ انہوں نے کہا کہ پی آئی اے کی نجکاری ممکن تھی لیکن حکومت کی سنجیدگی کا فقدان رہا۔ انہوں نے مزید کہا کہ شرح سود میں کمی کے باعث اسٹاک مارکیٹ میں تیزی دیکھنے کو ملی، لیکن اس میں حکومت کا کوئی خاص کردار نہیں۔
مفتاح اسماعیل نے الزام عائد کیا کہ وزیراعظم نے معاشی اصلاحات کی بجائے سیاسی مفادات کو ترجیح دی۔ انہوں نے کہا کہ ٹیکس نظام میں تبدیلی، پنشن اصلاحات اور دیگر معاشی اقدامات کرنے کی بجائے وزیراعظم نے ٹیکس لگانے سے گریز کیا۔
انہوں نے کہا کہ ملک میں معاشی اشاریے مثبت نہیں ہیں اور اگر ان میں بہتری نہ لائی گئی تو سرمایہ کاری کا عمل متاثر ہو سکتا ہے۔
