لاہور میں تجاوزات کے خاتمے کے لئے سخت کریک ڈاؤن کا فیصلہ کیاگیا ہے۔ رضا کارانہ طورپر تجاوزات ختم کرنے کے لئے 48گھنٹے کی مہلت دی گئی ہے۔ تجاوزات کے خلاف منگل صبح سے باضابطہ آپریشن شروع ہوگا۔ نگران وزیراعلیٰ پنجاب محسن نقوی نے تجاوزات قائم کرنے پر گرفتاری اور مقدمہ درج کرنے کا حکم دے دیا۔
وزیراعلیٰ محسن نقوی نے اسسٹنٹ کمشنر او رایس پی حضرات کو متعلقہ علاقوں میں آپریشن کی تیاری کی ہدایت کی اورکہا کہ انسداد تجاوزات مہم میں کوئی نرمی اور رعایت نہیں ہوگی، سختی کرنی پڑی تو کریں گے۔ 48 گھنٹے کی مہلت کے بعد لاہور میں تجاوزات کے خاتمے کے لئے کریک ڈاؤن شروع ہو جائے گا۔
وزیراعلیٰ نے کہا کہ ٹریفک کی آمدورفت میں رکاوٹ دور کرنے کے لئے تجاوزات کا خاتمہ ضروری ہے۔ انہوں نے کہا کہ بیشتر مقامات پر تجاوزات ہی ٹریفک جام کا باعث ہیں۔ وزیر اعلیٰ پنجاب محسن نقوی نے خصوصی اجلاس میں انسداد تجاوزات کے آپریشن کی باضابطہ منظوری دے دی۔اجلاس میں سیکرٹری ٹرانسپورٹ، سی سی پی او، کمشنر، ڈپٹی کمشنر،اسسٹنٹ کمشنرز اورپولیس حکام نے شرکت کی۔
