پاکستان تحریک انصاف نے ٹکٹوں کی تقسیم کا فارمولا طے کر لیا

الیکشن کمیشن آف پاکستان کی جانب سے عام انتخابات 2024 کا شیڈول جاری ہونے کے بعد ملک میں سیاسی سرگرمیوں میں تیزی آگئی ہے۔ ملک کی بڑی سیاسی جماعتوں کی جانب سے ٹکٹس فائنل کرنے کا عمل جاری ہے۔ پاکستان تحریک انصاف نے بھی امیدواروں کو ٹکٹوں کی تقسیم کا فارمولا طے کر لیا ہے۔ پاکستان تحریک انصاف کے رہنما بابر اعوان نے کہا ہے کہ جو لوگ مشکل وقت میں پارٹی کے ساتھ کھڑے رہے ہیں، انہیں عام انتخابات کے لیے پارٹی ٹکٹ دیا جائے گا۔ بابر اعوان  نے مزید کہا ہے کہ جو لوگ پارٹی چھوڑ گئے ہیں ان کی نشستوں پاکستان تحریک انصاف کے الیکٹیبلز یا وکلاء الیکشن لڑیں گے۔

انہوں نے مزید بتایا کہ بلے کا نشان چھن جانے کے خدشے کے پیشِ نظر بھی پاکستان تحریک انصاف  نے پلان بی پر کام شروع کر دیا ہے۔ میڈیا رپورٹ کے مطابق ذرائع پاکستان تحریک انصاف کا کہنا ہے کہ آزاد امیدواروں کو میدان میں لانے پر غور شروع کر دیا ہے۔ پارٹی چئیرمین بیرسٹر گوہر علی خان  نے اس حوالے سے کور کمیٹی کے ارکان کو اعتماد میں لے لیا ہے۔ ابتدائی طور پر خیبرپختونخوا کے ہر حلقے سے دو دو امیدواروں کو میدان میں لانے کے لیے ہوم ورک شروع کردیا گیا ہے۔ سوشل میڈیا اور موبائل میسج کے ذریعے ووٹر کو قائل کیا جائے گا۔ پی ٹی آئی چیئرمین بیرسٹر گوہر نے کہا ہے کہ اس وقت پاکستان تحریک انصاف کے پاس 70 فیصد عوام کی اکثریت ہے۔