عدالت کا وزیراعلیٰ کے پی کو 16 جنوری تک کسی بھی مقدمے میں گرفتار نہ کرنے کا حکم

عدالت کا وزیراعلیٰ کے پی کو 16 جنوری تک کسی بھی مقدمے میں گرفتار نہ کرنے کا حکم

پشاور: پشاور ہائیکورٹ نے خیبرپختونخوا کے وزیراعلیٰ علی امین گنڈاپور کی حفاظتی ضمانت منظور کرتے ہوئے 16 جنوری تک انہیں کسی بھی مقدمے میں گرفتار کرنے سے روک دیا۔
پشاور ہائیکورٹ کے جسٹس صاحبزادہ اسد اللہ اور جسٹس وقار احمد نے وزیراعلیٰ خیبرپختونخوا کی جانب سے دائر حفاظتی ضمانت کی درخواست پر سماعت کی۔ سماعت کے دوران ڈپٹی اٹارنی جنرل نے ایک رپورٹ پیش کی جس کے مطابق علی امین گنڈاپور کے خلاف اسلام آباد میں 32 اور پنجاب میں 33 مقدمات درج ہیں۔
عدالت نے وزیراعلیٰ خیبرپختونخوا کی درخواست منظور کرتے ہوئے 16 جنوری تک انہیں گرفتاری سے روک دیا اور ہدایت کی کہ وہ متعلقہ عدالتوں میں پیش ہوں۔
یہ ضمانت وزیراعلیٰ علی امین گنڈاپور کے خلاف ملک کے مختلف شہروں میں درج درجنوں مقدمات کے پس منظر میں دی گئی۔ عدالت نے واضح کیا کہ درخواست گزار کو دی گئی اس مہلت کے دوران تمام مقدمات میں گرفتاری عمل میں نہیں لائی جائے گی تاکہ وہ عدالتوں میں اپنی پیشیاں مکمل کرسکیں۔