توشہ خانہ ٹو کیس میں عمران خان اور بشریٰ بی بی پر فرد جرم عائد
اسلام آباد: تحریک انصاف کے بانی عمران خان اور ان کی اہلیہ بشریٰ بی بی پر توشہ خانہ ٹو کیس میں فرد جرم عائد کر دی گئی۔ کیس کی سماعت اڈیالہ جیل راولپنڈی میں اسپیشل جج سینٹرل شاہ رخ ارجمند نے کی۔
سماعت کے دوران سابق وزیراعظم عمران خان کو جیل سے عدالت لایا گیا، جبکہ ان کی اہلیہ بشریٰ بی بی جیل کے باہر سے عدالت میں پیش ہوئیں۔ جج شاہ رخ ارجمند نے فرد جرم پڑھ کر سنائی، جس کے بعد سماعت ملتوی کر دی گئی۔
واضح رہے کہ عمران خان پہلے ہی مختلف کیسز کے باعث اڈیالہ جیل میں قید ہیں۔ انہیں ابتدائی طور پر عدت کیس میں گرفتار کیا گیا تھا، جس کے بعد دیگر مقدمات میں گرفتاری اور رہائی کے احکامات جاری ہوتے رہے۔ دوسری جانب، بشریٰ بی بی عدت کیس میں بری ہو چکی ہیں اور دیگر مقدمات میں ضمانت پر رہا ہیں۔
اسی دوران، آج پی ٹی آئی کے سینئر رہنما شاہ محمود قریشی اور خاتون رہنما یاسمین راشد پر بھی فرد جرم عائد کی گئی۔ ان پر الزام ہے کہ 9 مئی کو لاہور میں تھانہ شادمان کی حدود میں جلاؤ گھیراؤ میں ملوث تھے۔ ان کا کیس لاہور کی انسداد دہشت گردی عدالت میں زیر سماعت ہے، جس کی سماعت کوٹ لکھپت جیل میں ہوئی۔
