میران شاہ میں 4، سپن وام میں 3 خوارج ہلاک
راولپنڈی:شمالی وزیرستان میں سیکیورٹی فورسز نے دو اہم کارروائیوں کے دوران 7 خوارج کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق، یہ آپریشن 10 اور 11 دسمبر کی درمیانی رات کو میران شاہ اور سپن وام کے علاقوں میں کیا گیا۔
پہلی کارروائی میران شاہ میں خوارج کی موجودگی کی اطلاع پر خفیہ معلومات کی بنیاد پر کی گئی، جس میں چار خوارج کو مؤثر انداز میں نشانہ بنا کر ہلاک کیا گیا۔
دوسری کارروائی سپن وام میں ہوئی، جہاں فائرنگ کے تبادلے میں مزید تین خوارج ہلاک ہوئے۔
ان کارروائیوں کے دوران، لانس نائیک محمد امین، جن کا تعلق فیصل آباد سے تھا اور جن کی عمر 34 سال تھی، بہادری سے لڑتے ہوئے شہید ہو گئے۔
آئی ایس پی آر کے اعلامیے کے مطابق، علاقے میں مزید خوارج کی موجودگی کے امکانات کے پیش نظر سرچ آپریشن جاری ہے۔
پاک فوج نے واضح کیا ہے کہ دہشت گردی کے خاتمے کے لیے ان کی جدوجہد جاری رہے گی اور ایسی قربانیاں قوم کے عزم کو مزید مضبوط کرتی ہیں۔
