صارفین سے بجلی کی قیمتوں پر بغیر حساب کتاب ٹیکسز وصولی کا انکشاف

صارفین سے بجلی کی قیمتوں پر بغیر حساب کتاب ٹیکسز وصولی کا انکشاف ہوا ہے۔ سرکاری پیداواری کمپنی کے حکام نے اعتراف کیا ہے کہ مہنگی بجلی والے تخمینے کا نظام بھی اندازوں پر مبنی ہے جبکہ بجلی گھروں کو کی جانے والی ادائیگیوں کے حساب کتاب کی تفصیلات بھی نیپرا اتھارٹی کے پاس نہیں ہیں۔

سینٹرل پاور کمپنی گدو نے اعتراف کیا ہے کہ کئی سالوں سے پاور پلانٹس کی قابل استعمال کیپسٹی اوور ہیٹ ریٹ کا ٹیسٹ نہیں ہوا۔

ہیٹ ریٹ ٹیسٹ قواعد و ضوابط میں پھنسنے کے ڈر سے نہیں کروایا گیا۔ سینٹرل پاور کمپنی حکام نے کہا ہے کہ قانون کے مطابق 3 سے 6 ماہ کے اندر پاور پلانٹس کے ٹیسٹ کرانا لازمی ہوتا ہے حکام سی پی پی اے رقم وصول کرتی رہی لیکن ذمہ داری پوری نہیں کی۔

دوسری جانب لیسکو کی جانب سے نادہندگان کے خلاف جاری مہم کو 85 روز مکمل ہو گئے ہیں۔ ترجمان لیسکو نے کہا ہے کہ مہم کے84 ویں روز536نادہندگان سے 1کروڑ 10لاکھ روپے سے زائد کی وصولی کرلی گئی۔ چیف انجینئراو اینڈ ایم (ٹی اینڈ جی) ظفر ا قبال نے تحصیلدار سٹی مجاہد ضیا اور تحصیلدار شالیمار نوریز ہمایوں کی معاونت سے نادرن سرکل میں 61نادہندگان سے1.39 ملین اور ایسٹرن سرکل میں 76 نادہندگان سے4.01 ملین کی ریکوری کی۔ منیجر میٹریل ڈسپوزل انجینئر انور وٹونے تحصیلدارماڈل ٹاؤن رانا ارسال اور تحصیلدارکینٹ سجاد قریشی کے ساتھ مل کر سینٹرل سرکل میں 53نادہندگان سے1.40 ملین اور ساوتھ سرکل میں 32 ڈیفالٹرز سے0.48 ملین کی ریکوری کی۔