شہید کارکنوں کے خاندانوں کو معاوضہ اور ملازمتیں دی جائیں گی: پی ٹی آئی کا اعلان

پاکستان تحریک انصاف کے چیئرمین بیرسٹر گوہر نے کہا ہے کہ پارٹی کے 5 ہزار کارکن لاپتہ ہیں، اور ان کے بارے میں ضلعی سطح پر معلومات جمع کی جا رہی ہیں۔

ایبٹ آباد میں میڈیا سے گفتگو کرتے ہوئے بیرسٹر گوہر نے بتایا کہ بشریٰ بی بی کا سیاست میں شمولیت کا کوئی ارادہ نہیں تھا، وہ احتجاج میں ایک عام کارکن کی طرح شامل ہوئیں۔

انہوں نے کہا کہ تحریک انصاف تمام سیاسی جماعتوں کے ساتھ مذاکرات کے لیے تیار ہے اور علی امین گنڈا پور پر خیبرپختونخوا کے سرکاری وسائل کے غلط استعمال کے الزامات بے بنیاد ہیں۔

بیرسٹر گوہر نے مزید وضاحت کی کہ ہماری تحریک پر گولی چلانا کسی صورت درست نہیں تھا، اور آئندہ کا لائحہ عمل بانی تحریک انصاف کی ہدایت کے مطابق طے کیا جائے گا۔ انہوں نے کہا کہ شہید کارکنوں کے گھروں جا کر تعزیت کی گئی ہے، اور خیبرپختونخوا حکومت ان کے خاندانوں کو معاوضہ دینے کے ساتھ بچوں کو ملازمتیں بھی فراہم کرے گی۔

انہوں نے مزید کہا کہ ہماری جدو جہد جمہوریت کی بحالی اور بانی تحریک انصاف کی رہائی کے لیے ہے۔ بیرسٹر گوہر کے مطابق، کارکن اپنی قربانیوں کے ذریعے ثابت کر رہے ہیں کہ وہ تحریک انصاف کے ساتھ ہیں، چاہے اس کے لیے انہیں اپنا کاروبار یا گھر بار کیوں نہ قربان کرنا پڑے