عمران خان پی ٹی آئی کے چئیرمین نہیں رہے، پاکستان تحریک انصاف کے انٹرا پارٹی الیکشن میں گوہر علی خان بلا مقابلہ چیئرمین پی ٹی آئی منتخب ہوگئے۔ تفصیلات کے مطابق آج پی ٹی آئی کے انٹرا پارٹی الیکشن منعقد ہوئے اور انتخابات کے لیے ووٹنگ کا عمل آن لائن مکمل کیا گیا۔ انتخابات میں بیرسٹر گوہر علی خان بلا مقابلہ چیئرمین پاکستان تحریک انصاف منتخب ہو گئے جبکہ چوہدری پرویز الہی کو مرکزی صدر پی ٹی آئی اور عمر ایوب کو مرکزی سیکرٹری جنرل منتخب کیا گیا۔
پاکستان تحریک انصاف کے چیف الیکشن کمشنر نیاز اللہ نیازی نے کہا کہ تحریک انصاف انٹرا پارٹی الیکشن میں ایک پینل سامنے آیا، قواعد کے مطابق اعلان کر رہے ہیں، قانون کی بالا دستی اور پاسداری پر ملک قائم ہوگا۔ آج پاکستان تحریک انصاف کے انٹرا پارٹی الیکشن ہوئے، چیئرمین سمیت دیگر امیدواروں نے کاغذات نامزدگی جمع کرا دیئے تھے۔
انہوں نے بتایا کہ پی ٹی آئی انٹرا پارٹی الیکشن میںچیئرمین سمیت دیگر امیدواروں کے کاغذات نامزدگی جمع کرانے کیلئے جمعہ کے روز سہ پہر 3 بجے تک وقت مقرر تھا۔
واضح رہے کہ بیرسٹر گوہر علی خان کو سابق چئیرمیں پی ٹی آئی عمران خان نے نامزد کیا تھا اور ان کے مقابلے پر کسی نے چئیرمین کی سیٹ کیلئے کاغزات نامزدگی جمع نہیں کروائے اور وہ بلا مقابلہ چئیرمین پی ٹی آئی منتخب ہوئے۔ الیکشن کمیشن نے پی ٹی آئی کو 20 روز کے اندر انٹرا پارٹی انتخابات کروانے کا حکم دیا تھا جس پر عمل کیا گیا ہے۔
