پی ٹی آئی کے نئے چئیرمین کی تقرری کا معاملہ، کور کمیٹی دو حصوں میں تقسیم ہوگئی

پی ٹی آئی کے نئے چئیرمین کی تقرری کا معاملہ، کور کمیٹی دو حصوں میں تقسیم ہوگئی۔ پاکستان تحریک انصاف کی کور کمیٹی کے رہنما اور وکلاء دو حصوں میں تقسیم ہو گئے ہیں۔ تفصیلات کے مطابق پاکستان تحریک انصاف کی کور کمیٹی کے سینئر رہنماؤں کی رائے ہے کہ چئیرمین پی ٹی آئی کا عہدہ کسی سیاسی رہنما کو دیا جائے، اگر چئیرمین کے عہدے پر کسی کو لانا ہے تو پارٹی کے دیرینہ سیاسی چہرے کو لایا جائے جس کو پوری پارٹی جانتی ہو۔

اس کے مقابلے مین پی ٹی آئی کی قانونی ٹیم کی رائے ہے کہ چئیرمین کا عہدہ عارضی طور پر کسی کو دے کر پارٹی بچائی جا سکتی ہے، چئیرمین کا عہدہ کسی ایسے شخص کو دیا جائے جو اتنا مضبوط ہو کہ پارٹی کو بچا لے۔ وضح رہے کہ پاکستان تحریک انصاف نے انٹرا پارٹی الیکشن جمعہ کو کرانے کا فیصلہ کیا گیا ہے، پی ٹی آئی کے انٹرا پارٹی الیکشن میں عمران خان حصہ نہیں لیں گے۔ پاکستان تحریک انصاف کے نائب صدر شیر افضل خان مروت نے بھی تصدیق کی ہے کہ قانونی قدغنوں کے باعث چیئرمین پی ٹی آئی انٹرا پارٹی الیکشن میں حصہ نہیں لے رہے ہیں۔

انہوں نے بتایا ہے کہ چیئرمین پاکستان تھریک انصاف عدالت سے نااہلی ختم ہونے پر دوبارہ پارٹی چیئرمین منتخب ہوں گے۔ پارٹی ذرائع کے مطابق انٹراپارٹی انتخابات میں چیئرمین کسی اور رکن کو منتخب کیا جائے گا، اس حوالے سے عمران خان نے جیل سے پارٹی کی کور کمیٹی کو پیغام پہنچا دیا ہے۔ ذرائع کے مطابق نئے پارٹی چیئرمین کیلئے نام کا فیصلہ عمران خان خود کریں گے۔