عدالت کا تمام کاروباری سرگرمیاں رات 10 بجے بند کروانے کا حکم

لاہور ہائیکورٹ نے شہر میں سموگ کے تدارک کے لیے تمام تر تجارتی سرگرمیاں ہر صورت رات 10 بجے بند کرانے کا حکم دے دیا ہے۔ تفصیلات کے مطابق لاہو ہائیکورٹ کی جانب سے جاری کردہ فیصلے میں حکم دیا گیا ہے کہ سی سی پی او لاہور رات 10 بجے تمام کاروباری سرگرمیاں بند کروانے کے عدالتی حکم پر عملدرآمد کروائیں، سموگ کو کنٹرول کرنے کے لیے نگران وزیر اعلیٰ کے سیکرٹری، سی سی پی او لاہور کو اقدامات کرنے کی ہدایات دیں، اس حوالے سے ایڈمنسٹریشن لاہور اور حکومت نوٹی فکیشن بھی جاری کرے۔

میڈیا رپورٹ کے مطابق لاہور ہائیکورٹ کے جج جسٹس شاہد کریم نے شہری ہارون فاروق سمیت دیگر کی درخواستوں پر تحریری حکم جاری کیا ہے، جس میں عدالت نے حکم دیا ہے کہ ہفتے میں 2 روز ورک فرام ہوم کا نوٹیفکیشن تمام نجی اداروں اور بینکوں سمیت جاری کیا جائے۔

دوسری جانب پنجاب حکومت نے سموگ پر قابو پانے کے لیے دوست ملک چین سے مشاورت کا فیصلہ کرلیا۔ سموگ کی روک تھام کے لئے حکومتی اقدامات بھی بے اثر ثابت ہورہے ہیں۔ نگران پنجاب حکومت اب سموگ پر قابو پانے کےلئے چین سے مشاورت کرے گی، چین میں ہفتے میں 2 روز کے لیے نصف گاڑیوں کو سڑکوں پر آنے کی اجازت ہوتی ہے، دوسرا یہ کہ چین میں کول پاور پلانٹس بند کرنے سے سموگ پر 40 فیصدتک قابو پا لیا گیا۔ چین میں مصنوعی بارش برسانے کے ساتھ ساتھ سپیشل گیلے ماسک استعمال کئے جاتے ہیں، پنجاب کے نگران وزراء نے مشاورت کےلئے چینی ماہرین کے ساتھ رابطہ کرلیا۔