پاکستان نے آئی ایم ایف کو پٹرولیم لیوی مزید بڑھانے کی یقین دہانی کرادی

پاکستان نے آئی ایم ایف کو پٹرولیم لیوی مزید بڑھانے کی یقین دہانی کرادی ہے جس کے بعد پاکستان میں پٹرولیم مصنوعات مہنگی ہونے کا امکان پیدا ہو گیا۔ پاکستان نے آئی ایم ایف کو رواں مالی سال میں پٹرولیم لیوی وصولی کو مزید 920 ارب روپے تک بڑھانے کی یقین دہانی کروا دی ہے۔

میڈیا رپورٹ کے مطابق حال ہی میں اختتام پذیر ہونے والے جائزہ مذاکرات کے دوران حکومت نے آئی ایم ایف کو 869 ارب روپے کے پٹرولیم لیوی کے سالانہ ہدف میں مزید 50 ارب روپے کا اضافہ کرنے کی یقین دہانی کروا دی ہے۔ رپورٹ کے مطابق حکومت فی لٹر پٹرول اور ڈیزل پر 60 روپے پٹرولیم ٹیکس وصول کرتی ہے۔حکومت نے 869 بلین روپے کی وصولی کا بجٹ رکھا ہے لیکن اب اسے بڑھا کر 920 بلین روپے تک پہنچانے کا فیصلہ کر لیا گیا ہے۔

واضح رہے کہ عالمی منڈی میں خام تیل کی قیمتیں 4 ماہ کی کم ترین سطح پر آ گئی ہیں جس کے بعد پاکستان میں بھی پٹرولیم مصنواعات سستی ہونے کا امکان پیدا ہو گیا تھا لیکن اب پٹرولیم لیوی میں اضافہ کی وجہ سے پٹرولیم مصنوعات کی قیمتیں کم ہونے امکان کم ہو گیا ہے۔