غیر قانونی طور پر موٹر سائیکل رکشا تیار کرنے والی ورکشاپس کیخلاف کریک ڈاؤن کا فیصلہ

چیف سیکرٹری پنجاب زاہد اختر زمان نے ہدایت کی ہے کہ غیر قانونی طور پر موٹر سائیکل رکشا تیار کرنے والی ورکشاپس کے خلاف سخت کارروائی عمل میں لائی جائے۔

انہوں نے یہ ہدایت آج یہاں سول سیکرٹریٹ میں اعلیٰ سطح کے اجلاس کی صدارت کرتے ہوئے کی۔اجلاس میں غیر قانونی طور پر موٹر سائیکل رکشا تیار کرنے والی ورکشاپس کیخلاف کریک ڈاؤن شروع کرنے کا فیصلہ بھی کیا گیا۔
چیف سیکرٹری نے کہا کہ موٹرسائیکلوں کو رکشا میں تبدیل کرنا غیر قانونی ہے، سیفٹی سٹینڈرڈز کے بغیر تیار کئے گئے موٹر سائیکل رکشا ماحولیاتی آلودگی اورحادثات کا سبب بنتے ہیں۔ انہوں نے کہا کہ غیر رجسٹرڈ موٹر سائیکل رکشوں کو رجسٹریشن کیلئے ایک ماہ کی مہلت دی گئی ہے اورصرف فٹنس کے معیار پر پور اترنے والے موٹر سائیکل رکشوں کی رجسٹریشن کی جائے گی۔ انہوں نے مزید کہا کہ ایک ماہ بعد کسی غیر رجسٹرڈ موٹر سائیکل رکشا کو چلنے کی اجازت نہیں ہوگی۔ چیف سیکرٹری نے سیکرٹری صنعت کو موٹر سائیکل رکشا تیار کرنے والی ورکشاپس کی رجسٹریشن کیلئے لائحہ عمل تیار کرنے سے متعلق ہدایات بھی جاری کیں۔

محکمہ ٹرانسپورٹ کے حکام نے اجلاس کو تفصیلی بریفنگ دی۔ انہوں نے بتایا کہ اب تک سات کمپنیوں کو موٹرسائیکل رکشا تیار کرنے کے لائسنس دیئے گئے ہیں جبکہ زیادہ تر موٹرسائیکل رکشا سیفٹی سٹینڈرڈز کے بغیرمقامی ورکشاپس میں تیار کئے جا رہے ہیں۔ محکمہ صنعت،قانون کے سیکرٹریز، ڈپٹی کمشنر، سی ٹی او لاہور اور متعلقہ افسران نے اجلا س میں شرکت کی۔