محکمہ موسمیات کی اہم پیشگوئی

محکمہ موسمیات کے مطابق پنجاب کے بیشتر اضلاع میں مو سم خشک رہے گا، جبکہ صبح کے اوقات میں سیالکوٹ، لاہور، گوجرانوالہ، نارووال، سرگودھا، اوکاڑہ، فیصل آباد، ٹوبہ ٹیک سنگھ،میں دھند اور سموگ چھائے رہنے کاا مکان ہے۔ اس کے علاوہ مری، گلیات اورگرد و نواح میں سرد اور مطلع جزوی ابر آلود رہے گا۔ جھنگ، خانیوال ،ملتان ، بہاولپور ، ڈیرہ غا زی خان اور گر دو نواح میں دھند اور سموگ چھائے رہنے کاا مکان ہے۔

محکمہ موسمیات کا کہنا ہے کہ اسلام آباد میں موسم سرد اور مطلع جزوی ابر آلود رہے گا، خیبرپختونخوا کے بیشتر اضلاع میں موسم خشک رہے گا، خیبرپختونخوا کے بالائی اضلاع میں موسم سرد اور مطلع جزوی ابر آلود رہے گا، جبکہ صبح کے اوقات میں پشاور، چارسدہ، نوشہرہ، مردان اور صوابی میں دھند پڑنےکا امکان ہے۔

دوسری جانب وزیراعلیٰ پنجاب محسن نقوی نے کہاہے کہ سموگ کی صورتحال کے پیش نظر آج کابینہ کمیٹی برائے انسداد سموگ کا اہم اجلاس منعقد ہوا، اجلاس میں سموگ کی موجودہ صورتحال کا تفصیلی جائزہ لیا گیا اور فیصلہ کیا گیاکہ لاہور سمیت صوبے کے سموگ سے متاثرہ علاقوں میں مصنوعی بارش برسائی جائے گی تاکہ سموگ کا خاتمہ کیا جا سکے۔

مصنوعی بار ش برسانے کے لئے بہاؤ الدین ذکریا یونیورسٹی ملتان او رپنجاب یونیورسٹی کے ماہرین سے فوری رابطہ کر لیا گیا۔ بیجنگ میں سموگ کا خاتمہ کرنے والی چینی ماہرین کی ٹیم کو مشاورت کے لئے لاہور آنے کی دعوت دی ہے۔چینی قونصل جنرل کے تعاون سے چینی ماہرین کی مشاورت سے سموگ پرقابو پانے کے لئے ریسرچ او رٹیکنالوجی استعمال میں لائیں گے۔ سموگ میں کمی کے لئے پنجاب حکومت کی ایک اور خصوصی ٹیکنیکل ٹیم بدھ کو الماتا روانہ ہوگی۔