نور مقدم قتل کیس: تھیراپی ورکس کے ملازم کا پولیس کے خلاف بڑا الزام

اسلام آباد(ویب ڈیسک) تھیراپی ورکس کے ایک ملازم، جس کی شناخت امجد کے نام سے ہوئی ہے، نے نورمقدم قتل کے مرکزی ملزم ظاہر جعفر اور تفتیشی افسر انسپکٹر عبدالستار کے خلاف شکایت درج کرائی ہے۔

"انسپکٹرعبدالستار ظاہر جعفر کو تحفظ فراہم کرنے کی کوشش کر رہے ہیں،” تھیراپی ورکس کے ملازم نے جمعہ کو ایک درخواست میں کہا۔

امجد نے انسپکٹر ستار پر الزام لگایا کہ وہ اسے گواہ کے بجائے ملزم کے طور پر عدالت میں پیش کر رہا ہے۔ انہوں نے استدعا کی کہ تفتیشی افسر اور ظاہر دونوں کے خلاف ایف آئی آر درج کی جائے۔

تھانہ کوہسار کے مجسٹریٹ کو درخواست ایڈووکیٹ شہزاد قریشی نے دائر کی تھی۔

"جرم کی رات، ظاہر نے مجھے 9 ایم ایم پستول سے مارنے کی کوشش کی لیکن اس سے گولی نہیں چلی۔ اس کے بعد اس نے مجھے چاقو سے زخمی کیا،‘‘ امجد نے کہا۔ "پولیس نے تفتیش کے دوران، میری خون آلود یونیفارم بھی جمع نہیں کی۔ میرا طبی معائنہ بھی نہیں کرایا گیا۔”

درخواست گزار نے مزید کہا کہ وہ ڈیڑھ سال سے تھیراپی ورکس کے ساتھ کام کر رہے ہیں۔ یہ تنظیم منشیات کے عادی افراد اور ذہنی طور پر غیر مستحکم افراد کو طبی علاج فراہم کرتی ہے۔

امجد ان چھ تھیراپی ورکس ملازمین میں سے ایک تھا جن پر کیس میں فرد جرم عائد کی گئی تھی۔ ان پر جرم چھپانے میں ظاہر کی مدد کرنے کا الزام ہے۔

جمعہ کو اسلام آباد کی سیشن عدالت کے جج عطا ربانی نے درخواست منظور کر لی۔ اس کی سماعت 13 نومبر کو ہوگی۔