لاہور میں گیس پائپ لائنیں زور دار دھماکے سے تباہ ہو گئیں

لاہور میں گجرپورہ کے علاقے میں امتیاز روڈ پر گیس پائپ لائنیں زور دار دھماکے سے تباہ ہو گئی۔ تفصیلات کے مطابق واقعہ لاہور کے علاقے گوجرپورہ میں پیش آیا جہاں دوپہر کے وقت زیر زمین گیس پائل لائنیں دھماکے سے پھٹ گئیں۔ گیس پائپ لائنوں میں دھماکے کی وجہ سے خاتون سمیت 2 راہگیر شدید زخمی ہو گئے ہیں۔

ذرائع کے مطابق زخمی ہونے والی 35 سالہ خاتون کا چہرہ جھلس گیا ہے جبکہ ایک شخص کے سر پر چوٹیں آئی ہیں، گیس پائپ لائنوں میں دھماکے کےبعدعلاقے میں خوف و ہراس پھیل گیا ہے۔ عینی شاہدین کے مطابق راہگیر گلی سے گزر رہے تھے کہ اچانک زور دار دھماکہ ہوا، اتنا بڑا واقعہ ہو گیا مگر متعلقہ ادارے شکایات کے باوجود نہیں پہنچے۔

ذرائع کا کہنا ہے کہ واسا اور سوئی گیس انتظامیہ ا یک دوسرے پر ذمہ داری ڈال رہے ہیں اور علاقے میں خوف و ہراس پھیلتا جا رہا ہے لیکن ضلعی انتظامیہ غائب ہے اور ابھی تک کوئی دھماکے کی جگہ نہیں پہنچا۔ علاقہ مکین خوف کے باعث گھروں سے باہر نہیں نکل رہے۔ علاقہ مکینوں نے مطالبہ کیا ہے کہ گجر پورہ میں سوئی گیس پائپ لائنوں کا مسئلہ فوری حل کروایا جائے۔