اسد عمر کا پی ٹی آئی چھوڑنے کا اعلان

پاکستان تحریک انصاف کے سینیئر رہنما اسد عمر نے پی ٹی آئی کو خیر باد کہہ دیا ہے، اس کے ساتھ ہی اسد عمر  نے ہمیشہ کے لیے سیاست کو چھوڑنے کا بھی اعلان کر دیا ہے۔ اسد عمر نے سوشل میڈیا سائٹ ایکس پر اپنے ٹویٹ میں کہا ہے کہ ایک دہائی سے زیادہ عوامی زندگی کے بعد میں نے سیاست کو مکمل طور پر چھوڑنے کا فیصلہ کر لیا ہے۔

اسد عمر  نے مزید کہا ہے کہ میں پہلے بھی عوامی سطح پر کہہ چکا ہوں کہ میں ریاستی اداروں کے ساتھ تصادم کی پالیسی سے متفق نہیں ہوں اور ایسی پالیسی ریاستی اداروں کے ساتھ شدید ٹکراؤ کا باعث بنی ہے جو کہ ملک کے مفاد میں نہیں ہے۔ اس لیے میں پاکستان تحریک انصاف کی بنیادی رکنیت سے استعفیٰ دے رہا ہوں۔

اسد عمر نے مزید لکھا کہ میں ان تمام لوگوں کا شکرگزار ہوں جنہوں نے عوامی زندگی میں میرا ساتھ دیا۔ خاص طور پر این اے 54 کی ٹیم اور ووٹرز کا شکریہ ادا کرتا ہوں جنہوں نے مجھے دو بار منتخب کیا اور میں نے اس حلقہ کی خدمت کرنے کی بھی بھر پور کوشش کی ہے۔ اللہ کریم پاکستانی قوم پر اپنی رحمتیں نازل فرمائیں۔

کچھ روز قبل اسد عمر نے میڈیا سے گفتگو کرتے ہوئے کہا تھا کہ صداقت عباسی یا عثمان ڈار جیسا کوئی کام کرنا ہوتا تو کب کا کر چکا ہوتا۔