نگراں وزیرا علیٰ خیبرپختونخوا انتقال گرگئے

نگران وزیراعلیٰ خیبرپختونخوہ اعظم خان انتقال گرگئے ہیں۔ تفصیلات کے مطابق نگران وزیراعلیٰ اعظم خان کو گزشتہ روز طبیعت خراب ہونے کے باعث ایک نجی ہسپتال منتقل کیا گیا تھا تاہم وہاں وہ جانبر نہ ہوسکے اور ان کا انتقال ہوگیا۔

نجی ہسپتال انتظامیہ نے نگراں وزیراعلیٰ خیبر پختونخوہ اعظم خان کے انتقال کی تصدیق کردی ہے اور بتایا گیا ہے کہ اعظم خان متعدد امراض میں مبتلاء تھے اور ان دنوں انہیں بخار اور ڈائریا کی شکایت بھی تھی جس کی وجہ سے وہ گزشتہ روز صوبائی کابینہ کے اجلاس میں بھی شریک نہیں ہوسکے تھے۔

ذرائع کے مطابق اعظم خان کا تعلق خیبرپختونخوہ کے ضلع چارسدہ سے تھا، انہوں نے رواں برس جنوری میں نگران وزیر اعلیٰ خیبرپختونخوہ کی حیثیت سے حلف اٹھایا تھا۔ اعظم خان بطور نگران وزیراعلیٰ خیبرپختونخوہ تعیناتی سے پہلے چیف سیکرٹری سمیت دیگر اہم عہدوں پر فائز رہے ہیں۔ اعظم خان  نے سابق نگران وفاقی وزیر کی حیثیت سے بھی خدمات سرانجام دیں تھیں۔ اعظم خان پٹرولیم اور مذہبی امور کی وزارتوں کے وفاقی سیکرٹری بھی رہے ہیں۔