وزیراعلیٰ پنجاب محسن نقوی رائیونڈ تبلیغی اجتماع میں پہنچ گئے

وزیر اعلی پنجاب محسن نقوی نے علی الصبح سالانہ عالمی تبلیغی اجتماع رائیونڈ کا دورہ کیا۔وزیراعلیٰ محسن نقوی نے عالمی تبلیغی جماعت کے علماء کرام و اکابرین مولانا احمد لاٹ، میاں احسن،امتیاز غنی، انوار غنی، مولوی عامر اور دیگرسے ملاقات کی اور اجتماع کے انتظامات کے بارے میں بات چیت کی گئی۔

وزیراعلیٰ محسن نقوی نے سالانہ عالمی تبلیغی اجتماع رائیونڈ کے انتظامات اور فراہم کردہ سہولتوں کا جائزہ لیا۔وزیراعلیٰ نے سی سی پی او اورکمشنر و ڈی جی ایل ڈی اے کو انتظامات کے حوالے سے ضروری ہدایات دیں۔وزیراعلی محسن نقوی نے کہا کہ اجتماع کی موثر مانیٹرنگ کیلئے کیمرے نصب کئے گئے ہیں اور اضافی پٹرو لنگ پولیس تعینات کی گئی ہے۔ ٹریفک کی روانی کیلئے ٹریفک وارڈنز کی تعداد میں اضافہ کیا ہے۔

وزیراعلی محسن نقوی نے کہا کہ پولیس، انتظامیہ اور متعلقہ ادارے بہترین کوآرڈینیشن کے ساتھ شاندار انتظامات اور فول پروف سکیورٹی پلان پر عملدرآمد یقینی بنا رہے ہیں۔ اجتماع کے اطراف لائٹس کا مناسب انتظام کیا گیا ہے۔اجتماع کیلئے بہترین سہولتوں کی فراہمی کیلئے پوری ٹیم مل کر کام کر رہی ہے۔وزیراعلی نے کہا کہ تبلیغی جماعت دین اسلام کی تبلیغ کے لئے گراں قدر خدمات سرانجام دے رہی ہے۔ اللہ تعالیٰ کے دین کو پھیلانے والے دین اوردنیا دونوں کما رہے ہیں۔

اس موقع پر مولانا احمد لاٹ نے عالم اسلام کے اتحاد، دین اسلام کی سر بلندی، امن اور استحکام کیلئے دعا کی۔اکابرین عالمی تبلیغی اجتماع  نے کہا کہ اجتماع میں 5 لاکھ لوگوں کی شرکت متوقع ہے۔پنجاب حکومت نے ہر سطح پر بہترین انتظامات کئے ہیں۔ صوبائی وزیر اوقاف اظفر علی ناصر، سی سی پی او، کمشنر لاہور ڈویژن، سیکرٹری اوقاف اور ڈی آئی جی آپریشنز اس موقع پر موجود تھے۔