پاکستان ائیر فورس ٹریننگ ائیر بیس میانوالی پر دہشتگرد حملے پر پی ٹی آئی کا بیان آگیا

پاکستان ائیر فورس ٹریننگ ائیر بیس میانوالی پر دہشتگرد حملے کے معاملے پر پاکستان تحریک انصاف نے ملک میں دہشت گردی کے بڑھتے واقعات پر اظہارِ تشویش کیا ہے۔ ترجمان پاکستان تحریک انصاف کا کہنا ہے کہ محض دو روز کے دوران ملک کے مختلف حصوں میں ہونے والے دہشت گردی کے واقعات ریاست کے لیے انتہائی تشویش کا باعث ہیں، سکیورٹی فورسز کے جوان اپنی جان پر کھیل کر بروقت کارروائ کے زریعے حملہ ناکام بنانے پر زبردست تحسین کے مستحق ہیں۔

ترجمان تحریک انصاف نے مزید کہا کہ الیکشن سے قبل ملک میں دہشت گردی کی نئی لہر کا سر اٹھانامختلف شبہات کو جنم دیتا ہے، دہشت گردی کے واقعات پر قابو پانے اور مزید سنگین نتائج سے بچنے کیلئے ایک مؤثر قومی حکمت عملی کی ضرورت ہے۔

پی ٹی آئی کی جانب سے کہا گیا ہے کہ عام انتخابات کے بروقت انعقاد کے نتیجے میں آنے والی عوام کی نمائندہ حکومت ہی پالیسی فیصلے لینے کا اختیار و مینڈیٹ رکھتی ہے، تحریک انصاف وطن کی راہ میں جرات و بہادری سے لڑتے اور جانیں قربان کرنے والے جوانوں کو خراج تحسین پیش کرتی ہے۔