کوئٹہ(ویب ڈیسک) بلوچستان کے ضلع ڈیرہ بگٹی میں مسلح افراد کے حملے میں لیویز کے کانسٹیبل سمیت 2 افراد جاں بحق جب کہ کوئٹہ میں دھماکے کے نتیجے میں 2 افراد زخمی ہوگئے۔
پولیس کا کہنا ہے کہ فائرنگ کا واقع ڈیرہ بگٹی کے علاقے پہلواغ کے قریب پیش آیا۔
مقتولین موٹرسائیکل پر سوار ہو کر ڈیرہ بگٹی شہر سے پھلواغ جا رہے تھے کہ نامعلوم حملہ آوروں نے انہیں گولی مار کر ہلاک کر دیا۔
بتایا جاتا ہے کہ ہلاک ہونے والے بلوچستان کے سابق وزیر داخلہ سرفراز بگٹی کی سیکیورٹی کا حصہ تھے۔
دوسری جانب کوئٹہ کے منیر مینگل روڈ پر دھماکے کے نتیجے میں دو پولیس اہلکار زخمی ہوگئے۔
انہیں پولیس ریکروٹنگ سینٹر کے سامنے نشانہ بنایا گیا۔ کچھ رپورٹس میں دعویٰ کیا گیا ہے کہ حملہ آوروں نے ان پر دستی بم پھینکا اور فرار ہوگئے۔
حملے کے بعد پولیس اور ایف سی کی نفری جائے وقوعہ پر پہنچ گئی۔
زخمی پولیس اہلکار علاقے میں گشت کر رہے تھے۔
